لاہور: تحریک انصاف نے پی ٹی آئی رہنما فواد چوہد ری کی غیرقانونی حراست کیخلاف آج احتجاج کا اعلان کردیا۔
تفصیلات کے مطابق تحریک انصاف کی رہنما مسرت جمشید چیمہ نے اعلان کیا کہ فواد چوہدری کی غیرقانونی حراست کیخلاف آج جی پی او چوک پر احتجاج ہوگا۔
مسرت جمشید کا کہنا تھا کہ وکلا،سول سوسائٹی،کارکنان بھرپور احتجاج ریکارڈ کرائیں گے، کچھ لوگ آئین اور قانون کو ایک طرف کر کے جنگل کا قانون چاہتے ہیں۔
انھوں نے کہا کہ پی ٹی آئی بطور جماعت اور کروڑوں عوام فوادچوہدری کے شانہ بشانہ ہیں، عمران خان نے ایک بار پھر پی ڈی ایم کو ضمنی انتخاب کا کھلا چیلنج دیدیا، عمران خان کے مقابلے میں جسے سیاسی مقبولیت کا زعم ہے وہ میدان میں آجائے۔
رہنما پی ٹی آئی کا موجودہ حکومت پر تنقید کرتے ہوئے کہنا تھا کہ کرپٹ ٹولے نے سیاست کو ریسکیو کرنے کے چکر میں ملک کو وینٹی لیٹر پر ڈال دیا ہے، ان کی سیاست کسی صورت ریسکیو نہیں ہونی، اب یہ اپنی سیاست کا تابوت ہی اٹھائیں گے۔
مسرت جمشید چیمہ نے کہا کہ قانون کی حکمرانی اور حقیقی آزادی کی جدوجہد میں ساری قوم شامل ہو چکی ہے۔
