اسلام آباد : پاکستان تحریک انصاف نے سپریم کورٹ پریکٹس اینڈپروسجر بل کی مخالفت کا فیصلہ کرلیا اور سینیٹرز کو پارلیمنٹ کے مشترکہ اجلاس میں شرکت کی ہدایت کردی۔
تفصیلات کے مطابق سپریم کورٹ پریکٹس اینڈپروسجر بل کے مشترکہ اجلاس سے منظوری کے معاملے پر پاکستان تحریک انصاف نے حکومتی بل کی مخالفت کا فیصلہ کرلیا۔
ذرائع کا کہنا ہے کہ پارلیمنٹ میں پی ٹی آئی کی پارلیمانی پارٹی کا اجلاس 3 بجے طلب کرلیا ہے، پی ٹی آئی پارلیمانی پارٹی کا اجلاس سینیٹر شہزاد وسیم کی زیر صدارت ہوگا۔
پارلیمانی پارٹی میٹنگ میں سینیٹرز اور اراکین اسمبلی شریک ہوں گے، اجلاس میں پارلیمنٹ کے مشترکہ اجلاس سے متعلق حکمت عملی مرتب کی جائے گی۔
یاد رہے پارلیمنٹ کا مشترکہ اجلاس آج شام 4 بجے ہو گا ، مشترکہ اجلاس کا 4 نکاتی ایجنڈاجاری کر دیا گیا ہے۔
سپریم کورٹ پریکٹس اینڈپروسیجرز بل ایجنڈے میں شامل ہیں ، صدرمملکت نے بل واپس پارلیمان کوبھیج دیاتھا ، پارلیمنٹ کےمشترکہ اجلاس میں بل کی منظوری دی جائے گی ، منظوری کے 10 دن بعد قانون نافذ العمل ہوجائے گا۔
