لاہور: پاکستان تحریک انصاف نے 23 دسمبر کو اسمبلیاں توڑنے کے بعد کی تیاری شروع کر دی۔
ذرائع کے مطابق پی ٹی آئی نے اسمبلیاں توڑے جانے کے بعد کی حکمت عملی کے بارے میں سوچنا شروع کر دیا ہے، اس سلسلے میں عمران خان پارٹی رہنماؤں سے مشاورت کے بعد اگلے لائحہ عمل کا اعلان کریں گے۔
ذرائع نے بتایا کہ تئیس دسمبر کے بعد مہنگائی، بے روزگاری اور حکومت کے خلاف جلسوں اور ریلیوں کا انعقاد کیا جائے گا، اور پی ڈی ایم کے بند ہونے والے کرپشن کیسز کو عوام میں اجاگر کیا جائے گا۔
ذرائع کے مطابق ملک بھر میں انتخابی مہم کا بھی آغاز کیا جائے گا، این آر او ٹو کو انتخابی اور احتجاجی مہم میں تنقید کا نشانہ بنایا جائے گا۔
اسمبلیاں توڑنے کا اعلان، اے آر وائی نیوز کی سب سے پہلے خبر دینے کی روایت برقرار
واضح رہے کہ پی ٹی آئی چیئرمین نے گزشتہ روز پنجاب اور خیبر پختون خوا کی اسمبلیاں تحلیل کرنے کا اعلان کر دیا ہے، انھوں نے کہا اگلے جمعہ کو پنجاب اور کے پی کی اسمبلیاں توڑ دیں گے، یہ اعلان کرتے ہوئے دونوں صوبوں کے وزرائے اعلیٰ بھی موجود تھے۔
انھوں نے وزرائے اعلیٰ کا اس فیصلے میں ساتھ دینے پر اظہار تشکر کیا اور کہا ملک کی خاطر دو اسمبلیاں قربان کرنے کا فیصلہ کیا ہے، قومی اسمبلی میں بھی جا کر استعفے منظور کرائیں گے۔
