The news is by your side.

پی ٹی آئی کا رحیم یار خان میں جلسہ، لاہور میں بھی کارکنان کی بڑی تعداد جمع

رحیم یار خان/ لاہور : پاکستان تحریک انصاف کے رحیم یار خان کے جلسے میں عوام کا زبردست جوش و خروش دیکھنے میں آرہا ہے، لبرٹی چوک میں پی ٹی آئی کارکنان نے تیاری کرلی۔

تفصیلات کے مطابق رحیم یار خان میں عمران خان کی آمد سے قبل ہی جلسہ گاہ مکمل بھرگئی، جلسہ گاہ میں ہزاروں کی تعداد میں عوام موجود ہیں، ۔پی ٹی آئی انتظامیہ نے جلسہ گاہ میں 30 ہزار کرسیاں لگانے کا دعویٰ کیا ہے۔

چیئرمین پی ٹی آئی عمران خان شام 6بجےجلسہ گاہ پہنچیں گے، ذرائع کا کہنا ہے کہ جلسے میں عمران خان کی جانب سے اہم اعلانات متوقع ہیں، جلسے کے راستوں پر سکیورٹی کے سخت انتظامات  کیے گئے ہیں جبکہ پولیس کی نفری تعینات کردی گئی ہے۔

اس کے علاوہ ملک کے مختلف شہروں میں یہ جلسہ بڑی اسکرینوں پردکھایا جائیگا، لاہور کے لبرٹی چوک پرتحریک انصاف لاہور نے کنٹینر بھی لگا دیا، یہاں 10فٹ لمبی ، 20 فٹ چوڑی اسکرین لگائی جارہی ہے۔

کنٹینر پر یاسمین راشد، اسلم اقبال، اعجازچوہدری و دیگرپی ٹی آئی رہنما خطاب کریں گے، مختلف مقامات سے تحریک انصاف کی ریلیاں لبرٹی چوک پہنچیں گی۔

علاوہ ازیں کراچی میں یونیورسٹی روڈ پر منگل بازار کے میدان میں لگائی جانے والی اسکرین پر عوام عمران خان کالائیو خطاب سن سکیں گے۔

اسی طرح اسلام آباد کے ایف نائن پارک اور راولپنڈی لال حویلی میں بڑی اسکرین کا اہتمام کیا گیا ہے جبکہ فیصل آباد میں کوہ نور پلازہ کے سامنے بڑی سکرین لگائی جائے گی۔

 

Comments

یہ بھی پڑھیں