پی ٹی آئی کے رہنما بیرسٹر ڈاکٹر محمد علی سیف نے کہا ہے کہ کے پی ضمنی انتخابات چیئرمین پی ٹی آئی کے مخالفین کیلئے ’’ٹریلر‘‘ ہے۔
تفصیلات کے مطابق پاکستان تحریک انصاف (پی ٹی آئی) کے رہنما بیرسٹر ڈاکٹر محمد علی سیف نے ایک بیان میں کہا ہے کہ تحریک انصاف ختم کرنے کا خواب دیکھنے والے خواب خرگوش سے جاگ جائیں۔
بیرسٹر ڈاکٹر سیف نے کہا کہ چوروں، کرپٹ، منافقین کی خیبرپختونخوا کی سیاست میں کوئی جگہ نہیں رہی، کے پی ضمنی انتخابات چیئرمین پی ٹی آئی کے مخالفین کیلئے ’’ٹریلر‘‘ ہے خیبر پختونخوا کے عوام نے ان کی سیاست کا خاتمہ کر دیا۔
بیرسٹر ڈاکٹر سیف کا کہنا تھا کہ تحریک انصاف کے انقلابی ورکرز اور عوام کو مبارکباد پیش کرتا ہوں، چیئرمین پی ٹی آئی جلد ہمارے درمیان ہوں گے، پی ٹی آئی اپنی قانونی و سیاسی جنگ جاری رکھے گی۔
بیرسٹر ڈاکٹر محمد علی سیف نے مزید کہا کہ تحریک انصاف کے انقلابیوں، ظلم اور بدمعاشی کی سیاہ رات چھٹنے والی ہے، حقیقی آزادی کا سورج طلوع ہو رہا ہے، بس تھوڑا صبر کریں۔
