پاکستان تحریک انصاف کے رہنما اور سابق ترجمان وزارت خزانہ مزمل اسلم نے کہا ہے کہ ن لیگ نے جھوٹی تشہر میں عوام کے اربوں روپے اڑا دیے۔
اے آر وائی نیوز کے مطابق پی ٹی آئی رہنما اور وزارت خزانہ کے سابق ترجمان مزمل اسلم نے اپنے بیان میں کہا ہے کہ ن لیگ نے جھوٹی تشہیری مہم میں عوام کے اربوں روپے اڑا دیے ہیں۔
مزمل اسلم نے اپنے بیان میں کہا کہ ن لیگ تشہیری مہم میں جی ڈی پی 4 فیصد دکھا رہی ہے جبکہ شہباز شریف حکومت کے ماتحت ہی نیشنل اکاؤنٹس کمیٹی کے اجلاس میں جی ڈی پی گروتھ میں اضافے کا امکان ظاہر کیا گیا ہے۔
مزمل اسلم نے اپنے ٹوئٹر اکاؤنٹ پر اس حوالے سے ایک ٹوئٹ کو ری ٹوئٹ بھی کیا ہے جس میں شہباز حکومت کی جانب سے شائع اشتہار میں 2018 کے ن لیگ حکومت کے اعداد وشمار کا تقابل 2022 کے اعداد وشمار سے کیا گیا ہے۔
مزید پڑھیں: رواں مالی سال قومی مجموعی پیداوار میں اضافے کا امکان
واضح رہے کہ نیشنل اکاؤنٹس کمیٹی کے اجلاس میں رواں مالی سال جی ڈی پی گروتھ میں اضافے کا امکان ظاہر کرتے ہوئے جی ڈی پی 5.9 فیصد رہنے کا امکان ظاہر کیا گیا ہے جب کہ گزشتہ مالی سال کے دوران جی ڈی پی گروتھ 5.7فیصد ریکارڈ ہوئی تھی۔
