اسلام آباد: صدارتی انتخاب کے موقع پر ووٹ ڈالنے کے لیے آنے والے تحریک انصاف رہنماؤں نے حکومتی صدارتی امیدوار عارف علوی کے لیے نیک خواہشات اور یقین کا اظہار کیا ہے کہ وہی فتحیاب ہوں گے۔
تفصیلات کے مطابق وزیر خارجہ شاہ محمود قریشی نے صدارتی انتخاب کے لیے قومی اسمبلی آمد کے موقع پر میڈیا سے گفتگو میں کہا کہ جمہوریت کا سفر رواں دواں ہے۔ پارلیمان اپنا جمہوری سفر پورا کرنے چلی ہے۔
انہوں نے کہا کہ عارف علوی پڑھے لکھے اور قابل ہیں، ان کا آئینی کردار اور سوچ ہے۔ اپوزیشن کا بظاہر اتحاد غیر فطری ثابت ہوا ہے۔
شاہ محمود قریشی کا کہنا تھا کہ اتحاد حکمران جماعت پر دباؤ ڈالنے کے لیے تھا۔ ہم توقع رکھتے ہیں کہ ہم اپنا مثبت کردار ادا کریں۔
انہوں نے مزید کہا کہ سو دن کے پروگرام کو حتمی شکل دینے کے لیے کاوشیں سامنے ہیں۔
وفاقی وزیر ریلوے شیخ رشید نے میڈیا سے گفتگو کرتے ہوئے کہا کہ ووٹ ملنے کا علم نہیں لیکن عارف علوی ضرور منتخب ہوں گے، امید ہے عمران خان اور عارف علوی ملک کو آگے لے کر چلیں گے۔
انہوں نے کہا کہ تمام سیاستدان میڈیا میں اپنی سیاست کر رہے ہیں۔ ممنون حسین چلے گئے اب ان کے بارے میں کیا کہنا، عارف علوی اور ممنون حسین میں واضح فرق ہے۔
سینیٹر شبلی فراز نے کہا کہ عارف علوی واضح اکثریت سے جیتیں گے، جمہوریت کے عمل کی ایک اور کڑی مکمل ہو جائے گی۔ عارف علوی عہدے کی ساکھ کو بہتر بنائیں گے۔
انہوں نے کہا کہ عارف علوی 380 ووٹ لینے میں کامیاب ہو جائیں گے۔ سینیٹ میں تحریک انصاف کو 40 ووٹ ملیں گے۔
