The news is by your side.

Advertisement

لانگ مارچ روکنے کا حکومتی فیصلہ: صورتحال سے نمٹنے کیلئے پی ٹی آئی کے 3 پلان تیار

اسلام آباد : تحریک انصاف کے رہنما اسد عمر کا کہنا ہے کہ عمران خان کی قیادت میں آزادی مارچ ہوکر رہے گا، صورتحال سے نمٹنے کیلئے ہمارے پلان اے بی سی تیار ہیں۔

تفصیلات کے مطابق تحریک انصاف کے رہنما اسد عمر نے حکومت کی جانب سے لانگ مارچ روکنے کے فیصلے پر اے آر وائی نیوز سے گفتگو کرتے ہوئے کہا کہ صورتحال سے نمٹنے کیلئے ہمارے پلان اے بی سی بنے ہوئے ہیں، عمران خان کی قیادت میں آزادی مارچ ہوکر رہے گا۔

اسد عمر کا کہنا تھا کہ کھلم کھلا آئین اور قانون کی خلاف ورزی کی جارہی ہے، ہم سب نے آئین کی پاسداری کرنی ہے کسی حکومت کی نہیں، فضل الرحمان بھی بہت سارے لوگ ہمارے دورمیں لیکر آئے تھے۔

انھوں نے بتایا کہ ہمارے دور میں حکومت گرانے کا کہہ کر دو بار لانگ مارچ کئےگئے، غیرفطری ، بیرونی مداخلت سے مسلط حکومت کا رویہ دیکھ لیں، بیرونی مداخلت سے مسلط حکومت آئین وقانون کی دھجیاں اڑارہی ہے۔

رہنما پی ٹی آئی نے کہا کہ منتخب حکومت کیخلاف عدم اعتماد کی تحریک کے بعد معیشت کا پہیہ رکا ہے، طاقت کےاستعمال سے پاکستان بند کرسکتے ہیں مگر چلا نہیں سکتے۔

اسد عمر نے سوال کیا کہ کیا اس وقت آپ کو پاکستان چلتا ہوا نظرآرہاہے ، ملک کی اہم شاہراہوں پر راستے بند کئےجارہےہیں ، میڈیا چینلز کو تو پیمرا کے قانون کو سامنے رکھ کر بات کرنا ہوتی ہے، کسی چینل کو بند کردینگے تو معاشرہ انتشار کی طرف جائے گا۔

ان کا مزیدکہنا تھا کہ پاکستان کو ہر لحاظ سے انتشار کی طرف لے جانے کی کوشش ہورہی ہے ، اےآروائی نیوز کو بند کرنےسے سچ نہیں رکے گا۔

Comments

یہ بھی پڑھیں