لاہور: پاکستان تحریک انصاف نے الیکشن کمیشن کے اعلان پر پارلیمنٹ میں بھرپور آواز اٹھانے کا فیصلہ کیا ہے۔
تفصیلات کے مطابق لاہور میں نیوز کانفرنس کرتے ہوئے پی ٹی آئی کے سیکریٹری جنرل اسد عمر نے کہا کہ ہمارے سینیٹرپارلیمنٹ کےمشترکہ اجلاس میں شرکت کریں گےاور الیکشن کمیشن کے غیر آئینی اقدام پر اپنا بھرپور موقف پیش کرینگے۔
نیوز کانفرنس میں اسد عمر کا کہنا تھا کہ آئین کےمطابق نوے دن کے بعد نگراں حکومت ہوہی نہیں سکتی، تیس اپریل کےبعد نگراں حکومت کی حیثیت ہی ختم ہوجائےگی۔
پی ٹی آئی کے خلاف انتقامی کارروائیوں کی مذمت کرتے ہوئے اسد عمر کا کہنا تھا کہ پی ٹی آئی کےرہنماؤں اورکارکنان کےگھروں پرچھاپےمارےجارہےہیں متعدد رہنما اور کارکنان اس وقت پابند سلاسل ہیں۔
پنجاب حکومت کی جانب سے بنائی گئی جے آئی ٹی پر پی ٹی آئی رہنما کا کہنا تھا کہ پنجاب حکومت ذمہ داری کا احساس کرتے ہوئےسیکیورٹی دیتی ہےتو اچھی بات ہے ہم جےآئی ٹی سےمکمل تعاون کریں گے۔
یہ بھی پڑھیں: پی ٹی آئی کا الیکشن کمیشن کا فیصلہ چیلنج کرنے کا اعلان
اس سے قبل پی ٹی آئی رہنما اسد عمر نے نیوز کانفرنس کرتے ہوئے کہا تھا کہ الیکشن کمیشن کے انتخابات ملتوی کرنے کے فیصلے کو چیلنج کیا جائے گا بیرسٹر علی ظفر پٹیشن پر کام کررہے ہیں کل سپریم کورٹ میں پٹیشن دائر کردی جائے گی۔
انہوں نے کہا کہ صدر مملکت کی جانب سے الیکشن کی تاریخ کا اعلان کیا جاچکا ہے اسے الیکشن کمیشن تبدیل نہیں کرسکتا، پٹیشن میں مطالبہ کیا جائے گا کہ 30 اپریل کو ہی الیکشن کروایا جائے۔
