لاہور: لاہور ہائیکورٹ میں آج پیر کو وزیر اعظم شہباز شریف کو عہدے سے ہٹانے کی درخواست پر سماعت نہ ہو سکی۔
تفصیلات کے مطابق پی ٹی آئی رہنماؤں کی وزیر اعظم شہباز شریف کو عہدے سے ہٹانے کی درخواست پر سماعت نہ ہو سکی، فاضل جج کے راولپنڈی بینچ میں ہونے کی بنا پر سماعت ملتوی کر دی گئی۔
سماعت تحریک انصاف کی رہنما عندلیب عباس اور حسان نیازی کی درخواست پر ہونا تھی۔
درخواست میں کہا گیا ہے کہ وزیر اعظم شہباز شریف کے خلاف منی لانڈرنگ کے کیسز زیر سماعت ہیں، شہباز شریف نے لندن دورے کے دوران اشتہاری ملزمان سے ملاقات کی، اور ترکی میں سلیمان شہباز کو سرکاری دورے میں شامل کیا۔
درخواست میں مؤقف اختیار کیا گیا ہے کہ شہباز شریف اختیارات کا غلط استعمال کر کے آئین کی خلاف ورزی کر رہے ہیں۔
پی ٹی آئی رہنماؤں نے درخواست میں استدعا کی ہے کہ لاہور ہائی کورٹ شہباز شریف اور ان کی کابینہ کو عہدوں سے ہٹانے اور ملک میں نگران وزیر اعظم تعینات کرنے کا حکم دے۔
