اسلام آباد : پاکستان تحریک انصاف کے یوم تاسیس کی تقریب آج اسلام آبادکنونشن سینٹرمیں ہوگی، تقریب میں وزیر اعظم عمران خان خطاب کریں گے جبکہ پی ٹی آئی کی تئیس سالہ جدوجہد پرتیار دستاویزی فلم دکھائی گی۔
تفصیلات کے مطابق پاکستان تحریک انصاف کے 23ویں یوم تاسیس کی تقریب اسلام آباد کنونشن سینٹرمیں منعقد ہوگی، یوم تاسیس کی تقریب میں وزیراعظم بطور مہمان خصوصی شرکت کریں گے اور تقریب سے خطاب بھی کریں گے۔
مہمانان گرامی خصوصاًوزیر اعظم کی آمدورفت پرلائحہ عمل طے کرلیا گیا ہے اور وزیراعظم کی بطور مہمان خصوصی شرکت کے باعث خصوصی سیکیورٹی اقدامات کئے گئے ہیں۔
تقریب میں شرکت کیلئے خصوصی پاسز کا اجرا کیا گیا ہے جبکہ میڈیا کے نمائندوں کیلئے خصوصی پویلین مختص کردیا گیا ہے۔
پاکستان تحریک انصاف کی 23سالہ جدوجہد پر آغاز سے آج تک تحریک کے ہر موڑ ہرپہلو کی کہانی پر دستاویزی فلم تیار کی گئی ہے ، دستاویزی فلم فیصل جاوید اور ان کی ٹیم نے تیار کی ہے جبکہ فلم کا ٹریلر جاری کردیا گیا ہے۔
مزید پڑھیں : آزادی کے بعد ہماری جدوجہدکسی بھی پارٹی سے بڑی تھی، وزیراعظم عمران خان
دستاویزی فلم یوم تاسیس کی مرکزی تقریب میں خصوصی طور پر چلائی جائے گی جبکہ وزیراعظم عمران خان یوم تاسیس کے موقع پر پارٹی آئین کا بھی اعلان کریں گے۔
یاد رہے وزیراعظم عمران خان نے سماجی رابطے کی ویب سائٹ ٹوئٹر پر یوم تاسیس کے موقع پر اپنے پیغام میں کہا تھا آج پی ٹی آئی کا23واں یوم تاسیس ہے، آزادی کےبعدہماری جدوجہد کسی بھی پارٹی سے بڑی تھی ، ہماری جدوجہد3مرحلوں پرمشتمل رہی، پہلا مرحلہ عوام کومتحرک کرنااورتبدیلی کے لیے پیغام دینا تھا، کرپٹ اسٹیٹس کوکیخلاف جنگ اورعوام کوآگہی دینا تھا، آگہی کہ قوم اپنے انسانی وسائل کوترقی دے کرترقی کرسکتی ہیں۔
عمران خان کا کہنا تھا میرے پیغام کوعوام تک پہنچنے میں 15سال لگے ، الیکشن لڑنے کے قابل پارٹی بنانے میں مزید7 سال لگے، اب ہم اپنے آخری مرحلے میں داخل ہوچکے ہیں، پاکستان کو ریاست مدینہ کے اصولوں پربنانا ہے، وہ معاشرہ بناناہےجو انصاف، انسانی وقاراورہمدردی پرمبنی ہو۔
