اسلام آباد : چیئرمین پی ٹی آئی عمران خان کی عدالت میں پیشی کے موقع پر ایک افسوسناک واقعہ پیش آیا ہے جس میں کارکنان تیز رفتارگاڑی سے گر کر زخمی ہوگئے۔
تفصیلات کے مطابق سابق وزیرِاعظم عمران خان آج جوڈیشل کمپلیکس میں انسداد دہشت گردی عدالت اور بینکنگ کورٹ میں پیش ہوئے، اس موقع پر پی ٹی آئی کارکنان کی بہت بڑی تعداد بھی ان سے اظہار یکجہتی کیلئے موجود تھی۔
عدالت میں پیشی کے موقع پر سیکورٹی صورتحال کے پیش نظر پولیس کی بھاری نفری ایف ایٹ کچہری کے اندر اور باہر تعینات کی گئی تھی ،ایف سی کے جوان بھی عدالت کے باہر تعینات رہے۔
اس دوران اپنے قائد کی محبت سے سرشار اور ان کی حفاظت کیلئے کارکنان عمران خان کی گاڑی کے ساتھ ساتھ چلتے رہے، ایسے میں موسم بھی خوشگوار تھا اور ہلکی ہلکی بارش بھی جاری تھی کہ سڑک پر پھسلن کی وجہ سے یہ حادثہ پیش آیا۔
اسی حوالے سے ایک ویڈیو بھی سوشل میڈیا پر وائرل ہو رہی ہے جس میں دیکھا جاسکتا ہے کہ ایک گاڑی پر متعدد کارکنان سوار ہیں، گاڑی تیز رفتاری سے جاتی ہے جس دوران کچھ لوگ گاڑی سے نیچے گرجاتے ہیں جس سے کچھ لوگوں کو معمولی نوعیت کی چوٹیں بھی آئیں۔
یاد رہے کہ اس گاڑی عمران خان موجود تھے یا نہیں تاہم اس کی تصدیق تاحال نہیں ہوسکی ہے البتہ یہ طے ہے کہ مذکورہ گاڑی عمران خان کے ساتھ آنے والے قافلے کا حصہ تھی۔
