اسلام آباد: پاکستان تحریک انصاف کی جانب سے الیکشن کمیشن سے بلے کے انتخابی نشان کے فوری اجرا کے مطالبے کا اعادہ کیا گیا ہے۔
تفصیلات کے مطابق پاکستان تحریک انصاف کی کور کمیٹی اجلاس کا اعلامیہ جاری کردیا گیا جس میں بلے کے انتخابی نشان کے اجرا کا مطالبہ کرتے ہوئے کہا گیا کہ شفاف انٹرا پارٹی انتخابات کے بعد انتخابی نشان سے محروم رکھنے کا کوئی آئینی جواز نہیں۔
پی ٹی آئی کور کمیٹی نے کہا کہ الیکشن کمیشن کروڑوں ووٹرز کی سیاسی شناخت یعنی بلّے کا انتخابی نشان جاری کرے۔
کورکمیٹی کی جانب سے ملکی تاریخ کے پہلے اور تاریخی ورچوئل جلسے کے کامیاب انعقاد پر اظہار اطمینان کیا گیا۔
اعلامیے میں کہا گیا کہ پاکستان سمیت دنیا بھر سے لاکھوں کی تعداد میں جلسے میں شرکت پر عوام کا شکریہ ادا کرتے ہیں۔ انٹرنیٹ اور سوشل میڈیا پلیٹ فارمز سے چھیڑچھاڑ کی کوششوں کی مذمت کرتے ہیں۔
کورکمیٹی تحریک انصاف نے کہا کہ ورچوئل جلسے نے انتخابات کے نتائج کا خاکہ دنیا کو دکھا دیا ہے۔ ورچوئل جلسے کے ذریعے تحریک انصاف اپنی انتخابی مہم کا باضابطہ آغاز کرچکی ہے۔
اعلامیہ میں کہا گیا کہ قومی و صوبائی اسمبلی کی ہرنشست پر امیدوارکھڑے کریں گے۔ قوم اپنے ووٹ کے تقدس، حرمت اور اہمیت کے پیش نظر پوری طرح تیار ہوجائے
کورکمیٹی کا کہنا تھا کہ 8 فروری کو ملکی تاریخ و سیاست کو ایک نئی ڈگر پر ڈالیں گے۔ کور کمیٹی نے لطیف خان کھوسہ کی پاکستان تحریک انصاف میں شمولیت کا بھرپور خیرمقدم بھی کیا۔
اعلامیے میں کہا گیا کہ پی ٹی آئی سردار لطیف خان کھوسہ کی صلاحیت و تجربے سے استفادہ کرے گی۔ سردار لطیف خان کھوسہ کے فیصلے کو تحسین و قدر کی نگاہ سے دیکھتے ہیں۔
