اسلام آباد: پاکستان تحریک انصاف کی قائمہ کمیٹی برائے نظم و احتساب نے پارٹی نظم و ضبط کی خلاف ورزی پر رکن پنجاب اسمبلی عظمیٰ کاردار کی بنیادی رکنیت ختم کردی۔
اے آر وائی نیوز کی رپورٹ کے مطابق پی ٹی آئی کی قائمہ کمیٹی برائے نظم و احتساب نے پارٹی نظم و ضبط کی خلاف ورزی پر بڑی کارروائی کرتے ہوئے رکن پنجاب اسمبلی کی بنیادی رکنیت ختم کرنے کا تحریری حکم نامہ جاری کیا۔
قائمہ کمیٹی کی جانب سے بنیادی رکنیت ختم کرنے کا تحریری حکم نامہ جاری کیا گیا ہے جس میں کہا گیا ہے کہ رکن صوبائی اسمبلی کو 15 جون کو اظہارِ وجوہ کا نوٹس دیا گیا اور انہیں ذیلی کمیٹی کے سامنے پیش ہونے کی ہدایت کی گئی تھی۔
عظمیٰ کاردار کا مؤقف سننے اور تمام ثبوتوں و شواہد کی بنیاد پر بنیادی رکنیت ختم کرنے کا فیصلہ کیا گیا۔
تحریک انصاف کی جانب سے جاری کردہ اعلامیے کے مطابق عظمیٰ کاردار نے غیر ذمہ داری کا مظاہرہ کیا، اُن کا رویہ نامناسب اور منصب کے شیانِ شان نہیں تھا۔
اعلامیے میں کہا گیا ہے کہ سنگین غلطی کے بعد عظمیٰ کاردار کسی پارلیمانی منصب کی اہل نہیں، وہ 7 روز کے اندر پارٹی ایلیٹ کمیٹی میں قائمہ کمیٹی برائے نظم و احتساب کے فیصلے کو چیلنج کرسکتی ہیں۔