لاہور: حمزہ شہباز کی کابینہ کے لیے وزرا کے نام سامنے آ گئے، نو منتخب وزیر اعلیٰ پنجاب کی کابینہ میں وزرا کے ناموں پر مشاورت کی گئی ہے۔
ذرائع کے مطابق ن لیگ کی جانب سے 2 مرحلوں میں حمزہ شہباز کی مختصر کابینہ تشکیل دینے پر غور کیا جا رہا ہے، اچھی کارکردگی والے وزرا کو پھر سے وہی قلمدان سونپے جائیں گے۔
ذرائع کا کہنا ہے کہ ملک احمد خان کو وزیر قانون بنایا جائے گا، سیف الملوک کھوکھر کو بھی وزیر بنایا جائے گا، میاں مجتبیٰ شجاع الرحمان کا نام بھی وزارت کے لیے زیر غور ہے۔
ذرائع کے مطابق رانا مشہود احمد خان کا نام وزیر تعلیم کے لیے زیر غور ہے، سلمان رفیق اور خواجہ عمران نذیر کو صحت کی وزارت دی جائے گی، بلال یاسین کو وزیر خوراک بنایا جائے گا۔
پیپلز پارٹی سے سید حسن مرتضیٰ اور علی حیدر گیلانی وزیر ہوں گئے، محسن جگنو کا نام بھی وزارت کے لیے زیر غور ہے، جب کہ اسپیکر پنجاب اسمبلی کا عہدہ ترین گروپ کو دیے جانے کا امکان ہے۔
خیال رہے کہ گزشتہ روز ذرائع نے بتایا تھا کہ پنجاب کابینہ 40 سے 50 ارکان پر مشتمل ہوگی، کل شام تک صوبائی کابینہ کے ارکان حلف اٹھا لیں گے، پیپلز پارٹی نے پنجاب کابینہ میں 3 وزارتوں میں دل چسپی کا اظہار کیا ہے، جن میں کمیونیکیشن اینڈ ورکس، خزانہ اور زراعت کے محکمے شامل ہیں۔
