ملتان / لاہور : پنجاب میں شدید دھند کے باعث فضائی اور زمینی سفر کرنے والے مسافر گھر سے نکلنے سے پہلے آگاہی ضرور حاصل کریں۔
تازہ ترین اطلاعات کے مطابق شدید دھند کے باعث ملتان ائیرپورٹ پر فلائٹ آپریشن معطل کردیا گیا ہے، ملتان ائیرپورٹ پر مسقط اورجدہ سے آنے والی پی آئی اے کی پروازوں کارخ موڑ دیا گیا۔
اس کے علاوہ مسقط سے آنے والی پرواز کا رخ اسلام آباد کی جانب موڑ دیا گیا جبکہ جدہ سے آنے والی پرواز کو لاہور روانہ کیا گیا ہے۔
ملتان ائیرپورٹ ذرائع کا کہنا ہے کہ جدہ اور شارجہ جانے والی2 پروازیں بھی تاخیر کا شکار ہیں، ملک اور بیرون ملک سفر کرنے والے مسافر ایئر پورٹ پہنچنے سے قبل متعلقہ ایئر لائن سے ضرور رابطہ کریں۔
دوسری جانب ترجمان موٹروے نے اپنے بیان میں کہا ہے کہ موٹر وے ایم ٹو لاہور سے کوٹ مومن تک دھند کے باعث بند کردی گئی ہے۔
اس کے علاوہ ملتان موٹروے بھی فیض پور سے درخانہ تک دھند کے باعث بند جبکہ سیالکوٹ موٹر وے ایم الیون دھند کی وجہ سے بند کی گئی ہے۔
ترجمان موٹروے کا مزید کہنا ہے کہ موٹر وے ایم فور پنڈی بھٹیاں سے عبدالحکیم، موٹر وے ایم فائیو شیر شاہ سے روہڑی تک دھند کے باعث بند کردی گئی ہے، لہٰذا شہری گاڑیوں پر فوگ لائٹ کا استعمال اور تیزرفتاری سے حتی الامکان گریز کریں۔
