لاہور: پنجاب حکومت نے ورکنگ وومن کو مزید سہولیا ت فراہم کرنے کے لیے انہیں سستی اور معیاری رہائش یقینی بنانے کا فیصلہ کرلیا، فی الحال 12 اضلاع میں 16 وومن ہاسٹلز فعال ہیں۔
تفصیلات کے مطابق صوبائی وزیر برائے وومن ڈویلپومنٹ آشفہ ریاض فتیانہ کا کہنا ہے کہ خواتین کو معاشی طور پر مستحکم بنانے کےلئے ضروری ہے کہ انہیں محفوظ،سستی اور معیاری رہائش فراہم کی جائے۔اس مقصد کے حصول کےلئے حکومت پنجاب ملازمت پیشہ خواتین کےلئے معیاری رہائش کو ہر صورت ممکن بنا رہی ہے۔
انہوں نے ورکنگ ویمن اتھارٹی کے حوالے سے قانون سازی کے مسودے پر متعلقین کی بحث کے موقع پر ان خیالات کا اظہار کیا۔ گورنمنٹ کے مختلف اداروں بشمول فنانس، ہائر ایجوکیشن، لیبر اینڈ ہیومن ریسورس، سوشل ویلفئیر اور بیت المال سپیشلائزڈ ہیلتھ کئیر اور لوکل گورنمنٹ اینڈکمیونٹی ڈویلپمنٹ کے نمائندگان اور نامور قومی اور بین الاقوامی این جی اوز یو اینویمن آل ویمن پاکستان ایسوسی ایشن، عورت فاونڈیشن، آگاہی، وائٹ رِبن، پنجاب ویمن چیمبر آف کامرس اینڈ انڈسٹر کے ارکان کے علاوہ پرائیویٹ ہاسٹلز کے مینجرز نے اس اجلاس میں اپنے خیالات کا اظہار کیا اور سفارشات پیش کیں۔
شرکاءکو 5ورکنگ گروپس میں تقسیم کیا گیا جہاں انہوں نے خواتین کی ضرورت کے ہر سیکٹر سے متعلق اپنی رائے سے آگاہ کیا۔سیکرٹری ویمن ڈویلپمنٹ نے وویمن ہاسٹلز اتھارٹی کے اقدامات کا ذکر کیاا ور کہا کہ تمام سٹیک ہولڈرز کی مشاورت کو مدِ نظر رکھتے ہوئے قانون سازی کے مسودے میں بہتری کےلئے کام کیا جائے گا۔
اتھارٹی کی شکل میں ریگولیٹری فریم ورک کے آغاز سے جاب مارکیٹ میں خواتین کا داخلہ اورنوکری کو برقرار رکھنا آسان ہو جائے گا۔فل الحال12اضلاع میں ڈائریکٹوریٹ آف ویمن ڈویلپمنٹ کے تحت 16ورکنگ ویمن ہاسٹلز، ویمن ڈویلپمنٹ ڈپارٹمنٹ کے انتظامی کنٹرول کے تحت کام کر رہے ہیں۔
صوبائی وزیر آشفہ ریاض فتیانہ نے بطور مہمان خصوصی اپنے خیالات کا اظہار کیا۔ انہوں نے خواتین کی اہمیت سے متعلق بات کرتے ہوئے کہا کہ کوئی بھی معاشرہ اس وقت تک ترقی نہیں کر سکتا جب تک اس کی آدھی سے زیادہ آبادی غیر مستحکم ہونے کے ساتھ محرومیوں کا شکار ہو۔ ویمن ہاسٹلز اتھارٹی کے قیام سے ہم اس بات کو یقینی بنائیں گے کہ کوئی بھی خواتین جو کام کرنے کی خواہش اور عزم رکھتی ہو وہ ناقص رہائشی سہولیات کے باعث اپنی ملازمت نہ چھوڑے۔ ان کا مزید کہنا تھا کہ حکومت پنجاب اس بات کو یقینی بنائے گی کہ صوبہ بھر میں تمام نجی و سرکاری ہاسٹلزمیں ملازمت پیشہ خواتین کو محفوظ، سستی اور معیاری رہائش فراہم کی جائے۔
یو این وومن پنجاب کی سربراہ حفصہ مظہر صدیقی نے شرکاءسے خطاب میں کہا کہ موثر اور پائیدار ترقی کےلئے ضروری ہے کہ عورتوں کے لیے صنفی مساوات ہو اور انہیں مستحکم کیا جائے۔ اس ایجنڈے کو مدِ نظر رکھتے ہوئے یو این ویمن حکومت پنجاب کے تعاون سے ایسا ماحول پیدا کرنے کے عزم پر رواں دواں ہے جہاں خواتین کو مردوں کے مساوی حقوق فراہم کئے جائیں۔
