پنجاب صحت کارڈ کے حامل شہریوں کے لیے ایک اور بُری خبر ہے کہ وہ اس کارڈ پر اب وفاق آزاد کشمیر سمیت کسی صوبے میں علاج نہیں کرا سکیں گے۔
اے آر وائی نیوز کے مطابق پنجاب کے شہریوں کے لیے صحت کی سہولتوں کے حوالے سے اہم خبر ہے کہ پنجاب صحت کارڈ کے حامل شہریوں کے لیے صحت سہولت پروگرام کی بین الصوبائی سہولت ختم کر دی گئی ہے۔ اس سہولت کے خاتمے سے اب پنجاب صحت کارڈ پر کل (یکم جولائی) سے وفاق، سندھ، کے پی، بلوچستان، جی بی اور آزاد کشمیر میں علاج بند کر دیا گیا ہے۔
اس حوالے سے اسٹیٹ لائف انشورنس کارپوریشن نے وفاقی دارالحکومت اسلام آباد، سندھ، بلوچستان اور خیبر پختونخوا سمیت آزاد کشمیر اور گلگت بلتستان کے پینل اسپتالوں کو خطوط لکھیں ہیں، جس میں انہیں پنجاب صحت کارڈ پر علاج کی مفت سہولتیں فراہم کرنے سے روک دیا گیا ہے۔
مراسلے میں کہا گیا ہے کہ یکم جولائی سے پنجاب کے رہائشی اسلام آباد، آزاد کشمیر اور گلگت بلتستان میں علاج نہیں کرا سکیں گے جب کہ صوبوں میں صرف یکم جولائی سے قبل زیر علاج پنجاب صحت کارڈ ہولڈرز بیماروں کا علاج ہوگا۔
اسٹیٹ لائف کارپوریشن کے مراسلہ کے مطابق بلوچستان اور خیبر پختونخوا صوبوں میں صحت سہولت پروگرام جاری رہے گا اور دونوں جگہ صحت سہولت کارڈ فعال رہیں گے۔
واضح رہے کہ اس سے قبل پنجاب حکومت نے صوبے کے سرکاری اسپتالوں میں مفت علاج کے لیے استعمال ہونے والا صحت کارڈ بند کر دیا تھا۔
دو روز قبل حکومت پنجاب کی جانب سے تمام سرکاری اسپتالوں کو 30 جون سے قبل واجبات کلیئر کرنے کے لیے ایک مراسلہ جاری کیا گیا تھا۔ اس مراسلہ میں کہا گیا تھا ہے کہ 30 جون کے بعد سرکاری اسپتالوں میں صحت کارڈ کی سہولت میسر نہیں ہوگی۔
سرکاری اسپتالوں میں مفت علاج کے لیے استعمال ہونے والا صحت کارڈ بند
