اسلام آباد : بینائی سے محروم کرنے والے ایوسٹین انجکشن کے استعمال پر پابندی اٹھانے کا فیصلہ کرلیا گیا اور ایوسٹین میڈیسن ری کال الرٹس منسوخ کر دیئے گئے۔
تفصیلات کے مطابق پنجاب حکومت نے ایوسٹین انجکشن کے استعمال پر پابندی اٹھانے کا فیصلہ کرلیا، ذرائع نے بتایا کہ پنجاب حکومت نے ایوسٹین میڈیسن ری کال الرٹس منسوخ کر دیئے اور ایوسٹین کے 4بیچ ریلیز کرنے کی منظوری دے دی ہے۔
ذرائع کا کہنا تھا کہ پنجاب کوالٹی کنٹرول بورڈ،ہائی پاور کمیٹی نے بیچ ریلیز کی منظوری دی ، پنجاب ڈرگ کنٹرول ڈائریکٹوریٹ سے ایوسٹین ری کال تنسیخی الرٹ بھی جاری کردیا۔
ذرائع نے کہا ہے کہ تنسیخی الرٹس کا اجرا ڈسٹری بیوٹر،ہول سیلر،ریٹیلر،ڈاکٹرز کیلئے کیا گیا ہے ، ڈرگ ٹیسٹنگ لیب لاہورایوسٹین انجکشن کے 4بیچ معیاری قرار دے چکی ہے۔
ایوسٹین 100 ایم جی کے تین اور 400ایم جی کا ایک بیچ قابل استعمال قرار دیا گیا ہے، جس کے بعد ڈسٹری بیوٹر، ہول سیلر، ریٹیلرز کو ایوسٹین پروٹوکولز یقینی بنانے کی ہدایت کرتے ہوئے کہا ہے کہ ڈاکٹرز ایوسٹین لگانے کیلئے درکار پروٹوکولز پر عملدرآمد یقینی بنائیں گے۔
