لاہور : صوبائی دارلحکومت لاہور میں تعلیمی اداروں میں چھٹیاں بڑھانے یا اوقات تبدیل کرنے سے متعلق کوئی فیصلہ نہیں ہوسکا تاہم تجاویز سامنے آئی ہیں۔
تفصیلات کے مطابق لاہور میں شدید سردی کی لہر کے باعث اسکولوں کی چھٹیاں بڑھانے کے معاملے پر ذرائع ایوان وزیراعلیٰ نے کہا ہے کہ چھٹیاں بڑھانے یا اوقات تبدیل کرنے سے متعلق کوئی فیصلہ نہیں ہوا۔
ذرائع کا کہنا تھا کہ نگران وزیراعلیٰ چھٹیاں بڑھانے کے حق میں نہیں، محکمہ اسکول ایجوکیشن جلد وزیراعلیٰ کو اپنی سفارشات پیش کرے گا، محکمہ اسکول ایجوکیشن کی سفارشات کی روشنی میں وزیراعلیٰ فیصلہ کریں گے۔
گزشتہ روز محکمہ اسکول ایجوکیشن کی طرف سے 4 تجاویز سامنے آئی تھیں، پہلی تجویزتھی کہ پرائمری تک اسکول کی چھٹیاں 9 سے بڑھاکر 15 جنوری تک کی جائیں جبکہ دوسری تجویزتھی اسکولز کے اوقات کار9 سے 2 بجے تک کئے جائیں۔
ذرائع کے مطابق تیسری تجویز تھی مارچ میں ہونے والے نویں اور دسویں کے امتحانات کے لیے صرف انہی طلبا کو اسکول بلایاجائے اور چوتھی تجویزتھی کہ باقی تمام کلاسز میں موسم سرما کی چھٹیاں بڑھائی جائیں۔
