لاہور: صوبہ پنجاب کے دارالحکومت لاہور میں سروسز اسپتال میں اینٹی کرپشن اہلکاروں اور ینگ ڈاکٹرز میں جھگڑے کے بعد ینگ ڈاکٹرز نے صوبے بھر کے اسپتالوں میں ایمرجنسی سروس میں کام بند کر دیا۔
سروسز اسپتال کی ایمرجنسی میں اینٹی کرپشن اہلکاروں کے سینئر نائب صدر ڈاکٹر عاطف پر تشدد کے خلاف پنجاب کے اسپتالوں میں ینگ ڈاکٹرز نے کام بند کر دیا۔ مریض رلنے پر مجبور ہوگئے۔
ڈاکٹر عاطف کا کہنا ہے کہ اہلکاروں نے انہیں شدید تشدد کا نشانہ بنایا۔
اینٹی کرپشن اہلکاروں نے وائی ڈی اے کے سینئر نائب صدر ڈاکٹر عاطف کے خلاف 35 لاکھ روپے کی خرد برد کے الزام پر گرفتاری کے لیے سروسز اسپتال میں چھاپا مارا تھا۔
وائی ڈی اے نے ڈاکٹروں کی گرفتاری اور مبینہ تشدد کے خلاف احتجاج کرتے ہوئے ہڑتال کر دی۔ سروسز، گنگا رام اور جنرل اسپتال سمیت صوبے بھر کے اسپتالوں میں او پی ڈیز بند کر دیں گئیں جس کے بعد مریضوں کو شدید مشکلات کا سامنا ہے۔
