The news is by your side.

Advertisement

’پشپا‘ کو بھارتی پولیس نے جرمانہ کر دیا

بلاک بسٹر تیلگو فلم ‘پشپا’ کے ہیرو کو بھارتی پولیس نے جرمانہ کر دیا ہے۔

تفصیلات کے مطابق بالی ووڈ سرکٹ میں بھی ہلچل مچانے والی تیلگو فلم پشپا کے ہیرو اللو ارجن پر بھارتی ٹریفک پولیس نے جرمانہ کر دیا۔

بھارتی میڈیا کے مطابق سپر اسٹار اللو ارجن حیدر آباد شہر میں ٹریفک قوانین کی خلاف ورزی کے مرتکب پائے گئے، جس پر پولیس نے ان کا چالان کر دیا۔

‘پشپا’ اس وقت قانون کی گرفت میں آئے جب سڑک پر دوڑتی ایک گاڑی کو ٹریفک اہل کار نے شیشوں پر کلر شیڈز کے ساتھ دیکھا، اہل کار نے گاڑی کو اشارہ کر کے روک لیا، تو معلوم ہوا کہ اندر بلاک بسٹر فلم کے ہیرو اللو ارجن موجود ہیں۔

ٹریفک پولیس نے ایمان داری سے ڈیوٹی انجام دیتے ہوئے ان کا چالان کر دیا، معلوم ہوا ہے کہ ٹریفک قانون کی خلاف ورزی پر اللو ارجن کو 700 روپے کا جرمانہ ادا کرنا پڑا۔

خیال رہے کہ بھارتی سپریم کورٹ نے کار کے شیشوں پر کلر شیلڈ لگانے پر 2012 میں پابندی عائد کی تھی۔

اللو ارجن اور ٹیم نے جولائی میں پشپا 2 کے پہلے شیڈول کے آغاز کی تیاری کر لی ہے، شائقین کو اس کی ریلیز کا شدت سے انتظار ہے، امکان ہے کہ یہ فلم 2023 کے موسم گرما میں ریلیز ہو۔

Comments

یہ بھی پڑھیں