کراچی : پیپلز پارٹی کے 3 ارکان قائم علی شاہ ، نثار کھوڑو اور نادر مگسی کو آٹھویں مرتبہ سندھ اسمبلی کے رکن منتخب ہونے کا اعزاز حاصل ہوگیا۔
تفصیلات کے مطابق سندھ اسمبلی میں ریکارڈ 60ارکان پہلی مرتبہ ایوان کا حصہ بن گئے، 130جنرل نشستو ں میں سے48پرارکان پہلی دفعہ سندھ اسمبلی کے رکن بنے ہیں۔
پی پی کے 3 ارکان کو ایوان کے سب سے سینئر رکن ہونے کا اعزاز حاصل ہوگیا، قائم علی شاہ ، نثار کھوڑو اور نادر مگسی آٹھویں مرتبہ سندھ اسمبلی کے رکن منتخب ہوئے۔
موجودہ اسپیکر آغاسراج ساتویں مرتبہ سندھ اسمبلی کے رکن ، پیپلزپارٹی کے ہی ڈاکٹر سہراب سرکی چھٹی مرتبہ اور پی پی کے10ارکان 5ویں مرتبہ عوام کے منتخب کردہ ایوان کا حصہ بنے جبکہ ہیراسماعیل سوہو پانچویں دفعہ ایم پی اے بنی ہیں۔
پی پی کے13ارکان چوتھی مرتبہ منتخب ہوکرسندھ اسمبلی پہنچے ہیں جبکہ 21ایسے ہیں جو تیسری مرتبہ سندھ اسمبلی کے تاریخی ایوان میں پہنچے۔
جنرل و مخصوص نشستوں پر 52ارکان کو دوسری مرتبہ سندھ اسمبلی رکن بننے کا اعزاز مل گیا جبکہ ایم کیوایم کے 24ارکان پہلی مرتبہ سندھ اسمبلی کے رکن بنے اور پی ٹی آئی حمایت یافتہ 9آزاد ارکان پہلی مرتبہ منتخب ایوان کا حصہ بنیں گے۔
خیال رہے سندھ اسمبلی کے اجلاس میں 148 نو منتخب ارکان نے حلف اٹھایا تھا ، اسپیکر آغا سراج درانی نے ارکان سے سندھی، اردو اور انگریزی میں حلف لیا۔
حلف لینے والوں میں نامزد وزیراعلیٰ سندھ مراد علی شاہ، فرال تالپور، شرجیل میمن، ناصر حسین شاہ اور دیگر بھی شامل ہیں جبکہ جی ڈی اےاوراتحادیوں نےاحتجاجاً حلف نہیں اٹھایا اور اپوزیشن کے 13 ارکان اسمبلی حلف برداری میں شریک نہیں ہوئے۔
