مکہ مکرمہ : مسجد الحرام میں حسن قرأت کے عالمی مقابلے کے فائنل راؤنڈ میں پاکستان کے چودہ سالہ طالب علم حافظ اعظم طارق نے جگہ بنا لی۔
تفصیلات کے مطابق مسجد الحرام میں قرآن کریم کے حفظ، حسن قرات اور تفسیر کا عالمی مقابلہ جاری ہے ، فائنل راونڈ میں پاکستان سےتعلق رکھنے والے چودہ سال کے حافظ نے جگہ بنالی۔
طالب علم حافظ اعظم طارق کی آواز نے سب کے دل جیت لئے، چھ ستمبر تک جاری رہنے والے مقابلے میں ایک سو سترہ ملکوں کے ایک سو چھیاسٹھ امیدوار شریک ہیں۔
مقابلہ جیتنے والوں میں مجموعی طور پر چالیس لاکھ ریال کے انعامات تقسیم کئے جائیں گے۔
وزیر اسلامی امور ڈاکٹر عبداللطیف آل الشیخ کا کہنا ہے کہ ’مقابلے میں اول آنے والوں کےلیے انعامی رقم بڑھا دی گئی ہے، پہلے زمرے میں اول آنے والے کو پانچ لاکھ ریال کا انعام دیا جائے گا’۔
خادم حرمین شریفین شاہ سلمان بن عبدالعزیز کی سرپرستی میں جمعے کو حسن قرات کا بین الاقوامی شاہ عبدالعزیز مقابلے کا آغاز کیا گیا تھا۔
