اسلام آباد: وزیر خارجہ شاہ محمود قریشی سے بیلجیئم کی نائب وزیر اعظم و وزیر خارجہ سوفی ولیمز نے رابطہ کیا، انہوں نے بیلجیئم کے سفارتی عملے کے انخلا میں معاونت پر شاہ محمود قریشی کا شکریہ ادا کیا۔
تفصیلات کے مطابق وزیر خارجہ شاہ محمود قریشی سے بیلجیئم کی نائب وزیر اعظم و وزیر خارجہ سوفی ولیمز نے فون پر رابطہ کیا۔
دونوں وزرائے خارجہ میں افغانستان کے حوالے سے تبادلہ خیال ہوا۔ وزیر خارجہ شاہ محمود قریشی کا کہنا تھا کہ کابل سے عالمی اداروں اور سفارتی عملے کے جلد انخلا میں مدد دے رہے ہیں۔
سوفی ولیمز نے بیلجیئم کے سفارتی عملے کے انخلا میں معاونت پر شکریہ بھی ادا کیا۔
یاد رہے کہ گزشتہ روز وفاقی وزیر اطلاعات فواد چوہدری کا کہنا تھا کہ پاکستانی سفارتخانہ 4 ہزار افراد کو ویزے جاری کر چکا ہے۔ سفارت کاروں، عالمی نمائندوں اور صحافیوں سمیت 14 سو افراد کو پاکستان لایا جا چکا ہے۔
انہوں نے کہا تھا کہ ابل میں پاکستانی سفارت خانے کا کردار دنیا بھر میں سراہا جا رہا ہے، افغانستان میں امن و استحکام کے خواہاں ہیں۔
