کتے کی انسانوں سے وفاداری اور محبت میں تو کوئی شک نہیں، لیکن یہ جانور دیگر جانوروں سے دوستی سے عموماً پرہیز کرتا ہے۔
لیکن حال ہی میں ایک انوکھی ویڈیو نے سب کی توجہ اپنی طرف مبذول کروالی، جس میں ایک کتا ایک سہمے ہوئے خرگوش کو چھیڑنے اور اس سے دوستی کرنے کی کوششوں میں مصروف ہے۔
مزید پڑھیں: ہانگ کانگ میں خرگوش کیفے
ایک گھر کے لان میں ریکارڈ کی گئی ویڈیو میں دیکھا جاسکتا ہے کہ ایک کتا اچھل کود میں مصروف ہے جبکہ اس کے قریب بیٹھا خرگوش سہما ہوا بیٹھا ہے، شاید کتے سے خوفزدہ ہے۔
لیکن کتے کی چھیڑ چھاڑ اور دوستانہ انداز نے خرگوش کا ڈر ختم کردیا اور وہ آرام سے کتے کے ساتھ کھیلنے لگا۔
کتوں کا ذکر ہوا تو آپ کو بتاتے چلیں کہ سائنس دانوں کا کہنا ہے کہ کتوں کے لیے اپنے مالک کو خوش کرنا بہت اہمیت رکھتا ہے۔
ایک تحقیق کے مطابق کتے خواب میں بھی اپنے مالک کی خوشبو، اس کی مسکراہٹ کو دیکھتے ہیں، یا وہ خود کو ایسی حرکتیں کرتے ہوئے دیکھتے ہیں جس سے ان کا مالک بہت خوش یا بہت تنگ ہوتا ہو۔
ماہرین کا کہنا ہے کہ کتے جن چیزوں سے اپنے مالک کو خوش ہوتا دیکھتے ہیں وہ ان کو زیادہ یاد رکھتے ہیں اور بعد میں وہی کرنے کی کوشش کرتے ہیں۔ اس طرح وہ اپنے مالک کو خوش کرنا چاہتے ہیں۔
