کراچی: شوبز انڈسٹری کو خیرباد کہنے والی سابق گلوکارہ رابی پیرزادہ بھی مشکل وقت میں مستحق افراد کی مدد کے لیے میدان میں آگئیں اور انہوں نے اپنے ہاتھ سے تیار کی جانے والی پینٹنگز فروخت کے لیے پیش کردیں۔
رابی پیرزادہ نے کرونا لاک ڈاؤن کے بعد پیدا ہونے والی صورت حال کے پیش نظر غریبوں اور مستحق افراد میں راشن تقسیم کیا۔ انہوں نے سماجی رابطے کی ویب سائٹ پر سامان کی تصویر شیئر کرتے ہوئے اللہ کا شکر ادا کیا۔
انہوں نے لکھا کہ ’میں ابھی 100 سے زائد خاندانوں میں راشن تقسیم کر رہی ہوں، میں اب گلوکارہ نہیں مگر اللہ کے نام کی خوبصورت خطاطی کر کے انہیں فروخت کرتی ہوں‘۔
رابی نے بتایا کہ جو رقم حاصل ہوتی ہے اُس سے غریبوں کی مدد کرتی ہوں۔ انہوں نے اپنی پینٹنگز کی تصاویر شیئر کیں اور دلچسپی رکھنے والے افراد کو ایک نمبر بھی دیا۔ رابی پیرزادہ نے اس پینٹنگز کی قیمت تیس سے پچاس ہزار روپے مقرر کی ہے۔
یاد رہے کہ رابی پیرزادہ گلوکاری کی دنیا کو خیرباد کہنے کے بعد پینٹنگ اور خطاطی شروع کی تھی۔ انہوں نے اپنا کام مداحوں کے ساتھ شیئر کیا تھا جسے صارفین نے بہت زیادہ پسند کیا تھا۔
اللہ کا شکر ہے، میں ابھی 100 سے زیادہ خاندانوں کو راشن آٹا دے رہی ہوں۔ میں اب سنگر نہیں ہوں نہ شوبز سے پیسے آتے ہیں۔ اللہ کا نام لکھتی ہوں اور جو اسے خریدتے ہیں اسکی رقم لوگوں کے کام آتی ہے۔ انکی قیمت 30سے 50 ہزار ہے۔ رابطہ
Inam bhai
03216775072 pic.twitter.com/7dn03BJJNh— Rabi Pirzada (@Rabipirzada) April 10, 2020
واضح رہے کہ کرونا وائرس کا پھیلاؤ روکنے کے لیے پاکستان سمیت دنیا بھر کے ممالک میں لاک ڈاؤن ہے جس کی وجہ سے یومیہ اجرت کمانے والے افراد کو پریشانی کا سامنا کرنا پڑ رہا ہے۔ پاکستانی شوبز انڈسٹری اور کھیلوں کی دنیا کے معروف اسٹارز نے ایسے موقع پر آگے بڑھ کر ضرورت مندوں کی مدد کی اور راشن تقسیم کیا۔
