شوبز انڈسٹری کی معروف اداکارہ رابعہ کلثوم کا کہنا ہے کہ بالی ووڈ میں شاہد کپور کے ساتھ کام کرنا پسند کروں گی۔
اداکارہ رابعہ کلثوم نے نجی ٹی وی کے مزاحیہ شو میں شرکت کی اور اس دوران نجی زندگی، شوبز سمیت دیگر موضوعات پر کھل کر اظہار خیال کیا۔
میزبان نے رابعہ کلثوم کی انسٹاگرام پوسٹ دکھائی جس میں وہ پیٹرول کی قیمت بڑھنے پر تبصرہ کررہی تھیں۔ رابعہ کلثوم نے لکھا تھا کہ ’ہمارا پیٹرول چاند پر جارہا ہے ہم نہیں جا پارہے ہیں۔‘
انہوں نے کہا کہ آپ کو کچھ لوگ ایسے بھی ملیں گے جو اس پیٹرول کی پوسٹ کو بھی منفی انداز میں لیں گے اور تبصرے شروع کردیں گے اور کہتے ہیں آپ فلاں کو سپورٹ کرتی ہیں تو اس لیے بول رہی ہیں۔
اداکارہ نے کہا کہ یہاں تک کہ لوگ عمرے کی تصویر پر بھی تنقید کرتے ہیں میں کسی کو جواب نہیں دیتی بس خاموشی اختیار کرلیتی ہوں۔
میزبان نے سوال کیا کہ والدین اگر شوبز انڈسٹری میں ہوں تو آسانی ہوجاتی ہے آپ اس بارے میں کیا کہیں گی؟
رابعہ کلثوم نے کہا کہ والدہ نے کبھی سفارش نہیں کی اور انہوں نے پہلے ہی کہہ دیا تھا کہ میں تمہارے یا بھائی فیضان شیخ کے لیے کوئی سفارش نہیں کروں گی۔
انہوں نے کہا کہ والدہ کہتی ہیں کہ اپنی محنت اور جدوجہد سے اندسٹری میں آگے بڑھو، اگر والدہ سفارش کرتیں تو میں بڑے کردار کررہی ہوتی لیکن آج تک سائیڈ رول کررہی ہوں۔
ایک سوال کے جواب میں رابعہ کلثوم نے کہا کہ بالی ووڈ میں میری پسندیدہ اداکارہ ایشوریہ رائے تھیں لیکن اب عالیہ بھٹ بہت پسند ہیں۔
میزبان نے پوچھا کہ کس بالی ووڈ اداکار کو دیکھ کر لگتا ہے کہ اس کے ساتھ آپ کی جوڑی اچھی لگے گی؟
رابعہ کلثوم نے کہا کہ مجھے شاہد کپور بہت پسند ہیں، ان کی اداکاری اور شخصیت بہت اچھی لگتی ہے اور ان کے ساتھ ہی اداکاری کرنا چاہوں گی۔
واضح رہے کہ رابعہ کلثوم سینئر اداکارہ پروین اکبر کی صاحبزادی اور اداکار فیضان شیخ کی بہن ہیں۔
رابعہ کلثوم نے اے آر وائی ڈیجیٹل کے ڈرامہ سیریل ’مجھے پیار ہوا تھا‘ میں وہاج علی کی بہن ’نیلو‘ کا کردار نبھایا تھا جسے مداحوں کی جانب سے بھرپور پذیرائی ملی تھی۔
