کراچی: شہر قائد میں ہونے والی بارش کے سبب کراچی کے مختلف علاقوں میں سڑکوں پر پانی جمع ہوگیا جس سے ٹریفک کی روانی شدید متاثر ہوئی، متعدد شاہراہوں پر بدترین ٹریفک جام ہوگیا، دفاتر سے واپس جانے والے لاکھوں شہری سڑکوں پر پھنس کر رہ گئے، وزیر بلدیات نے کہا ہے کہ ناتھا خان پل کے اطراف سے پانی نکالنے کا کام شروع کردیا۔
ایئرپورٹ اور شارع فیصل پر زیادہ پانی جمع
اطلاعات کے مطابق موسلا دھار بارش کے سبب شارع فیصل، ڈالمیا، راشد منہاس روڈ، گلشن اقبال، گلستان جوہر، نیپا چورنگی، ناتھا خان، ڈرگ روڈ، شاہ فیصل اور اطراف کی شاہراہوں پر بارش ہوتے ہی بڑی مقدار میں پانی جمع ہوگیا جس شہری انتظامیہ کی جانب سے کئی گھنٹے گزرنے کے باوجود تاحال نہیں نکالا جاسکا اور نہ پیشگی ایسے انتظامات کیے گئے کہ پانی جمع ہی نہ ہو۔
پانی نکالنے کا کام شروع کردیا، وزیر بلدیات جام خان شورو
اے آر وائی نیوز نے وزیر بلدیات سندھ کو آن لائن لیا اور سوالات کیے جواب میں جام خان شورو نے کہا کہ انتظامات شروع کردیے ہیں، ناتھا خان کے دونوں اطراف سے پانی کی نکاسی کے لی مشینیں بھیج دی ہیں جنہوں نے کام شروع کردیا ہے ،چند گھنٹوں میں پانی بالکل نکال دیا جائے، ہمیں احساس ہے کہ لوگوں کو ایئرپورٹ بھی جانا ہے اور لوگ کئی گھنٹے سے پھنسے ہوئے ہیں۔
بارش کی پیشگی اطلاع نہیں تھی، ایئرپورٹ کے اطراف 56ملی میٹر بارش ہوئی، وزیر بلدیات
وزیر بلدیات نے مزید بتایا کہ ایئرپورٹ کے اطراف 56 ملی میٹر بارش ہوئی، اس بارش کی پیش گوئی نہیں تھی یہ بارش اچانک ہوئی جس کی وجہ سے یہ حالت ہوئی، آئندہ بارش کے پانی کی نکاسی کے پیشگی انتظامات کریں گے شہریوں کو دوبارہ تکلیف اٹھانی نہیں پڑے گی۔
ایئرپورٹ جانے والا راستہ زیادہ جام ہے ، نمائندہ اے آر وائی
اے آر وائی نیوز کے رپورٹر انجم وہاب کے مطابق ایئرپورٹ جانے والے رستے پر پانی جمع ہونے کے سبب شدید ٹریفک جام ہے، ہزاروں گاڑیاں کئ گھنٹوں سے وہاں پھنسی ہوئی ہیں،ناتھ خان پل کے دونوں اطراف سڑک پر نیچے گھٹنوں گھٹنوں پانی جمع ہے اس کی نکاسی کا کوئی انتظام نہیں کیا گیا، ہر انتظامیہ یہ مسئلہ حل کرنے کا کہتی ہے لیکن تاحال یہ مسئلہ حل نہیں ہوا۔
ہر بار بارش میں یہاں ایسا ہی ہوتا ہے،انجم وہاب
رپورٹر نے مزید بتایا کہ یہاں ہر بار بارش میں ایسا ہی ہوتا ہے، شہری انتظامیہ نے وزیراعلیٰ سندھ کے احکامات ہوا میں اڑا دیے ہیں ، بارش ہونے کے کئی گھنٹوں بعد بھی پانی کی نکاسی ممکن نہ ہوسکی، متعدد گاڑیاں بند بھی ہوگئیں اور کئی گاڑیوں کا فیول ختم ہوگیا، کئی شہری گاڑیاں چھوڑ گئے، مسافر شدید پریشانی سے دوچار ہیں ان میں سے کچھ کی فلائٹ بھی تھی جنہیں ایئرپورٹ جانا تھا۔
دفاتر سے نکلنے والے لاکھوں شہری پھنس کر رہ گئے
اطلاعات ہیں کہ دفاتر سے جانے والے لاکھوں افراد سڑکوں پر پھنس کر رہ گئے ہیں، شہری انتظامیہ کی نااہلی نے باران رحمت کو باران زحمت بنا دیا۔
اگلے 24 گھںٹوں میں دوبارہ بارش کا امکان
اس حوالے سے محکمہ موسمیات نے کراچی میں مزید بارشوں کی پیش گوئی کی ہےاور کہا ہے کہ اگلے چوبیس گھنٹوں میں دوبارہ بارش کا امکان ہے۔
دریں اثنا بارش کے بعد پکوڑوں اور سموسوں کی دکان پر رش لگ گیا اور لوگوں موسم سے لطف اندوز ہوتے رہے
People of Karachi enjoy rainy weather by arynews
