The news is by your side.

Advertisement

ملک کے مختلف شہروں میں بارشیں، موسم سہانا ہوگیا

راولپنڈی / کراچی : ملک کے مختلف شہروں میں رات گئے موسلادھاربارش کے بعد موسم خوشگوار ہوگیا، محکمہ موسمیات نے کراچی میں آج مطلع جزوی ابر آلود رہنے اور ہلکی بارش کی پیشگوئی کی ہے۔

تفصیلات کے مطابق ملک بھر میں مون سون کی بارشوں کا سلسلہ جاری ہے۔ اس حوالے سے موصولہ اطلاعات کے مطابق راولپنڈی اور اسلام آباد سمیت گردونواح کے علاقوں میں رات گئے موسلادھار بارش ہوئی، جس کے بعد ہلکی ہلکی ٹھنڈ نے موسم کو مزید سہانا کردیا۔

لاہور میں بھی تیزہواؤں کے ساتھ بارش کا پانی خوب برسا، ہری پور شہر او رگردونواح میں گرج چمک کی ساتھ بارش نے جل تھل ایک کردیا۔

لاہور میں آج صبح سویرے کالی گھٹاوں نے ڈیرے ڈال لیے، بدھ کی صبح شہر میں کالی گھٹاوں کے ساتھ تیز ہوائیں چلیں جس سے گرمی کا زور ٹوٹ گیا، تیز ہواؤں کے ساتھ موسلا دھار بارش سے موسم انتہائی خوشگوار ہوگیا۔

محکمہ موسمیات کے مطابق آئندہ چوبیس گھنٹوں کے دوران مزید بارش کا امکان ہے، لاہور کے علاوہ پنجاب کے دیگر شہرمریدکے، شیخوپورہ، گوجرانوالہ، سکھیکھی، سرائے عالمگیر، کالاباغ ، گجرات، قصور اور ساہیوال کے بعض علاقوں میں بارش ہوئی ان علاقوں مزید بارش کا امکان ہے۔

راولپنڈی کے علاقوں سیدپور، بوکڑہ،پی ایم ڈی اور شمسی آ باد میں22 ملی میٹر سے زائد بارش ریکارڈ کی گئی، ایم ڈی واسا کا کہنا ہے کہ نالہ لئی میں پانی کے بہاؤ کی مسلسل نگرانی کررہے ہیں، یہاں پانی کی سطح کٹاریاں پر6فٹ، گوالمنڈی پل پر4 فٹ تک ہے، واسا کا عملہ نشیبی علاقوں سے پانی نکالنے میں مصروف ہے

دوسری جانب موسم کا حال بتانے والوں نے کہا ہے کہ آج شہر قائد کراچی میں موسم ابر آلود رہےگا، ہلکی بارش کا بھی امکان ہے،
صبح کے اوقات میں کراچی کا درجہ حرارت31ڈگری سینٹی گریڈریکارڈ کیا گیا جبکہ آج زیادہ سے زیادہ درجہ حرارت 34ڈگری تک ریکارڈ کیے جانے کا امکان ہے۔

محکمہ موسمیات کے مطابق کراچی میں ہوا میں نمی کا تناسب73فیصد،اور رفتار12کلومیٹر فی گھنٹہ ریکارڈ کی گئی۔

اس کے علاوہ شیخوپورہ، گجرات اور فیروز والا میں بارش اور سانگلہ ہل اور اس کے گرد و نواح میں تیزآندھی کے ساتھ بوندا باندی ہوئی، محکمہ موسمیات کے مطابق لاہورمیں آئندہ3روز تک مزید بارش کی پیشگوئی ہے۔

Comments

یہ بھی پڑھیں