کراچی: صوبہ سندھ کے بیش تر اضلاع میں آج سے جمعرات تک گرج چمک کے ساتھ بارش کا امکان ہے۔
تفصیلات کے مطابق محکمہ موسمیات نے آج سے نئے مون سون سسٹم کے تحت صوبہ سندھ کے مختلف علاقوں میں تیز بارش کی پیش گوئی کی ہے۔
محکمہ موسمیات نے کہا ہے کہ کراچی شہر میں کل 24 اگست سے بارش برسے گی اور وقفے وقفے سے جمعرات 25 اگست تک جاری رہے گی، پیش گوئی کے تحت کہیں کہیں درمیانی اور کہیں پر موسلادھار بارش ہوگی۔
موسمیات کا کہنا ہے کہ مون سون کا یہ نیا سسٹم بھارت سے صوبہ سندھ میں داخل ہو رہا ہے اور یہ بہت ہی طاقت ور ہے۔ ڈائریکٹر محکمہ موسمیات نے ایک بیان میں یہ بھی کہا ہے کہ بھارت سے آنے والا یہ طاقت ور سسٹم 26 اگست سے ختم ہو جائے گا۔
نئے سسٹم کے تحت خیرپور، سکھر، لاڑکانہ، گھوٹکی، کشمور اور جیکب آباد میں موسلادھار بارش متوقع ہے، تھرپارکر، عمر کوٹ، سانگھڑ، بدین، حیدر آباد اور ٹھٹھہ میں بھی موسلادھار بارش کی پیشگوئی ہے۔
محکمہ موسمیات نے بلوچستان میں بھی آج سے جمعرات تک موسلادھار بارشوں کی پیش گوئی کی ہے، جس کی وجہ سے بلوچستان سے متصل سندھ کے اضلاع میں سیلاب کا خدشہ ہے۔
محکمے نے خبردار کیا ہے کہ بلوچستان میں بارشیں دادو، جامشورو، قمبر شہدادکوٹ میں سیلاب کا سبب بن سکتی ہیں۔
