ابوظبی: متحدہ عرب امارات میں پہلا روزہ 23 مارچ اور عیدالفطر 21 اپریل کو ہونے کا امکان ہے۔
تفصیلات کے مطابق یو اے ای میں فلکیاتی انجمن کے سربراہ ابراہیم الجروان نے کہا ہے کہ اس سال رمضان کا پہلا روزہ جمعرات 23 مارچ کو ہونے کا امکان ہے۔
انھوں نے کہا روزے کا دورانیہ 14 گھنٹے ہوگا، جب کہ عید الفطر جمعہ 21 اپریل کو ہونے کی توقع ہے۔
ابراہیم الجروان کے مطابق رمضان کا چاند منگل 21 مارچ کو سورج غروب ہونے کے بعد رات 9 بج کر 23 منٹ پر طلوع ہوگا۔ بدھ 22 مارچ کو شعبان کی 30 تاریخ ہوگی اور جمعرات کو رمضان کا پہلا روزہ ہوگا۔
انھوں نے عید الفطر کے حوالے سے بتایا کہ شوال کا چاند جمعرات 20 اپریل کو صبح 8 بج کر 30 منٹ پر طلوع ہوگا۔
غروب آفتاب کے وقت چاند مغربی افق پر چار ڈگری بلندی پر نظر آئے گا، جسے سورج غروب ہونے کے تقریباً 22 منٹ تک دیکھا جا سکے گا۔ عید کاپہلا دن جمعہ 21 اپریل کو ہوگا۔
فلکیاتی انجمن کے سربراہ نے مزید کہا کہ اس سال رمضان کے پہلے اور آخری روزے میں تقریباً 40 منٹ کا فرق ہوگا، جب کہ پہلا روزہ آخری روزے کے مقابلے میں چھوٹا اور آخری روزہ لمبا ہوگا۔
پہلا روزہ تقریباً 12 گھنٹے 16 منٹ اور آخری روزہ 12 گھنٹے 54 منٹ کا ہوگا۔