لاہور: گوجرانوالا کی انسداد دہشت گردی عدالت نے وفاقی وزیر داخلہ رانا ثنا اللہ کو دہشت گردی کے مقدمے سے بری کردیا۔
تفصیلات کے مطابق انسداد دہشت گردی عدالت میں وفاقی وزیر داخلہ رانا ثنااللہ کے خلاف گجرات کے تھانہ انڈسٹریل میں درج مقدمے کی سماعت ہوئی۔
راناثنااللہ کیخلاف گجرات میں چیف سیکرٹری، سرکاری افسران کو دھمکیاں دینے کا مقدمہ درج تھا، عدالے نے نوٹس کے ذریعے راناثنااللہ کو طلب کیا تھا۔
وزیر داخلہ رانا ثنا اللہ انسداد دہشتگردی کی عدالت میں پیش ہوئے، دوران سماعت مدعی مقدمہ اپنے بیان سے منحرف ہو گیا جس پر انسداددہشت گردی کی عدالت نے رانا ثنا اللہ کو مقدمہ سے بری کر دیا۔
واضح رہےکہ رانا ثنا اللہ کے خلاف 25 اگست 2022 کو شاہ کاز اسلم نامی شہری کی مدعیت میں انسداد دہشت گردی کی دفعات کے تحت مقدمہ درج کیاگیا تھا۔
مقدمے میں ان پر چیف سیکرٹری اور ان کے اہلخانہ کو جان سے مارنے کی دھمکیاں دینے کا الزام عائد کیا گیا تھا۔
