ممبئی: بالی وڈ کے معروف اداکار رنویر سنگھ فلم نگری میں ’شاندار فلمی کیریئر‘ کے لیے ایوارڈ ملنے پر ناقدین کے نشانے پر آگئے۔
رنویر سنگھ نے حال ہی میں مراکش میں ’مراکش انٹرنیشنل فلم فیسٹیول‘ میں شرکت کی جہاں انہیں فلم انڈسٹری میں ’شاندار کیریئر‘ کے لیے ایٹائل ڈی آر (گولڈن اسٹار) ایوارڈ سے نوازا گیا۔
اداکار نے اعزاز ملنے کی خبر کو مداحوں کے ساتھ شیئر کرنے کا فیصلہ کیا۔ انہوں نے تقریب کی تصاویر انسٹا گرام پر پوسٹ کر دیں۔
کیپشن میں رنویر سنگھ نے لکھا: ’سنیما لوگوں کو متحد کرنے والی قوت ہے۔ فخر ہے کہ میرے کام نے ثقافتی اور جغرافیائی سرحدیں عبور کرلیں۔ مجھے مراکش میں محبت اور پہچان ملی۔‘
انہوں نے مزید لکھا کہ ایوارڈ سے نوازنے پر مراکش انٹرنیشنل فلم فیسٹیول کا شکریہ ادا کرتا ہوں، اپنی ثقافت کا سفیر ہونے اور عالمی سطح پر بھارتی سنیما کی نمائندگی کرنے پر فخر محسوس کر رہا ہوں۔
View this post on Instagram
رنویر سنگھ کی مذکورہ پوسٹ پر مداحوں نے مبارکباد دینے کے بجائے ان پر تنقید کے تیر برسا دیے۔ مداحوں کے تبصرے ملاحظہ کیجیے:
• ’پیسوں سے خریدا ہوا ایوارڈ کسی کام نہیں آتا‘
• ’اس دو ٹکے کے ایوارڈ کو کون مانتا ہے؟‘
• ’بالی وڈ کو ناکام فلمیں دینے والے کو ایوارڈ۔۔ بڑی شرم کی بات ہے!‘
• ’بالی وڈ میں لاتعداد باصلاحیت لوگوں موجود ہیں لیکن اس کے باوجود رنویر سنگھ کو ہماری نمائندگی کے لیے چنا گیا۔ مجھے بھارتی ہونے پر افسوس ہو رہا ہے۔‘
