تامل ناڈو : بھارت میں ایک پولیس اہلکار نے موٹر سائیکل سوار نوجوانوں کو تیزرفتاری سے منع کیا جس پر ملزمان نے اہلکار کی پٹائی کردی۔
تامل ناڈو پولیس نے پولیس اہلکار پر تشدد کے الزام میں چار ملزمان کو گرفتار کرلیا جبکہ ایک ملزم مفرور ہے، سی سی ٹی وی فوٹیج سوشل میڈیا پر وائرل ہوگئی۔
مذکورہ ویڈیو میں دیکھا جاسکتا ہے کہ 30سالہ پولیس اہلکار اشوک نے موٹر سائیکل روک کر ان ملزمان کی سرزنش کی جس پر ان کے درمیان تلخ کلامی ہوگئی۔
پولیس اہلکار جیسے ہی اپنی موٹر سائیکل سے اترا تو ملزمان میں سے ایک نے اس کے منہ پر مکا رسید کیا جس کے بعد اس کے دیگر ساتھیوں نے بھی اس کا ساتھ دیا۔
ملزمان نے تشدد کرکے پولیس اہلکار اشوک کا ہاتھ توڑ دیا، جائے وقوعہ پر موجود افراد نے ملزمان کو پکڑ کر پولیس کے حوالے کردیا، پولیس مزید کارروائی کے لیے معاملے کی تفتیش کر رہی ہے۔
بھارتی میڈیا کے مطابق ملزمان میں عبدالرحمٰن، رکانپاشا، اسلم علی اور رضوان شامل ہیں، ملزم عبدالرحمن مقامی کونسلر کا بیٹا بتایا جارہا ہے۔
