راولاکوٹ: آزاد کشمیر کے شہر راولاکوٹ میں ایک غار میں چھپے 4 دہشت گرد پولیس مقابلے میں ہلاک ہو گئے، جب کہ 2 اہلکار شہید ہو گئے۔
تفصیلات کے مطابق ایس ایس پی راولاکوٹ ریاض مغل نے پریس کانفرنس میں بتایا کہ پولیس کو اطلاع ملی تھی کہ حسین کوٹ کے جنگل میں دہشت گرد موجود ہیں، جس پر جنگل میں چھاپا مارا گیا، دہشتگرد ایک غار میں چھپے تھے۔
ایس ایس پی کے مطابق پولیس نے غار کا محاصرہ کیا اور دہشت گردوں کو پکڑنے کی کوشش کرنے لگی، تاہم ایک دہشتگرد نے دستی بم پھینک دیا، جس کے جواب میں پولیس نے فائرنگ کی، جس سے چاروں دہشت گرد ہلاک ہو گئے۔
ریاض مغل کے مطابق دہشتگروں کی فائرنگ سے 2 اہلکار گلزار اور طارق بشیر شہید ہو گئے ہیں، جب کہ ہلاک دہشت گردوں میں زرنوش نسیم، اس کا بھائی جبران نسیم، الفت اور ایک نامعلوم شخص شامل ہے۔
راولاکوٹ میں گاڑی کھائی میں گرنے سے 5 پولیس اہلکار شہید
دہشتگردوں سے 3 کلاشنکوف، گرینیڈ، 4 خود کش جیکٹس اور راؤنڈز برآمد ہوئے، ان کا تعلق کالعدم ٹی ٹی پی سے ہے، جن کو افغانستان سے ڈاکٹر رؤف ہینڈل کر رہا تھا، دہشت گرد آزاد کشمیر میں بڑی کارروائی کرنا چاہتے تھے۔
ایس ایس پی راولاکوٹ کے مطابق دہشتگرد زرنوش نے اپنے ساتھیوں کے ساتھ اس سے قبل شجاع آباد میں پولیس اہلکار سجاد ریشم کو قتل کیا تھا۔
