معروف بھارتی اداکار رضا مراد کو شراب نوشی کی اپنی وائرل ویڈیو سے متعلق وضاحت پیش کردی ہے۔
گزشتہ دنوں بالی ووڈ انڈسٹری کے اداکار رضا مراد کی شراب نوشی کی ایک ویڈیو سوشل میڈیا پر وائرل ہوئی تھی جس کے بعد سے انہیں شدید تنقید کا سامنا کرنا پڑ رہا ہے۔
ویڈیو میں اداکار کو چند لوگوں کے ساتھ شراب نوشی کرتے اور جشن مناتے دیکھا گیا تھا، جس کے بعد ویڈیو سوشل میڈیا پر آگ کی طرح پھیل گئی تھی اور انہیں مسلمان ہوتے ہوئے رمضان کے مہینے میں شراب نوشی کر کے جشن منانے پر سوشل میڈیا صارفین نے آڑے ہاتھوں لے لیا تھا۔
تاہم اب اپنی ویڈیو کے کمنٹ سیکشن میں رضا مراد نے وضاحت پیش کرتے ہوئے بتایا کہ مذکورہ ویڈیو دہلی میں شوٹنگ سیٹ کی ہے اور یہ فلم کا ایک سین ہے۔
View this post on Instagram
انہوں نے لکھا کہ ’براہ کرم یہ نہ سوچیں کہ سالگرہ کی تقریب یا کسی طرح کی پارٹی چل رہی ہے، وائرل فوٹیج فلم کے ایک سین کی ہے، جسے کچھ دن پہلے چھتر پور دہلی میں شوٹ کیا گیا تھا، ان مناظر میں میرے کردار کی سالگرہ منائی جا رہی ہے‘۔
اداکار رضا مراد نے مزید لکھا کہ ’واقعے کے بارے میں کچھ معلوم کیے بغیر، آپ نے یہ سمجھ لیا کہ مارچ میں میری سالگرہ کی تقریب ہو رہی ہے، اور آپ لوگ اس وقت مارچ میں ہیں اور میری سالگرہ نومبر میں آتی ہے۔
انہوں نے مزید کہا کہ آپ کو ایسا لگ رہا ہے کہ میں رمضان میں سرعام شراب کر رہا ہوں، جو کہ بالکل غلط ہے یہ صرف شوٹنگ کا ایک سین ہے اور کچھ بھی نہیں۔‘
یاد رہے کہ رضا مراد کا کیرئیر کئی دہائیوں پر محیط ہے وہ بالی ووڈ کی متعدد فلموں کا حصہ رہے ہیں، جن میں گنگوبائی کاٹھیاواڑی، پدماوت، باجی راؤ مستانی سمیت کئی دیگر فلمیں شامل ہیں۔
