ہم روحِ سفر ہیں ہمیں ناموں سے نہ پہچان
کل اور کسی نام سے آجائیں گے ہم لوگ
رضی اختر شوقؔ کا یہ شعر بہت مشہور ہوا اور ان کی پہچان بنا۔ آج اردو شاعری میں جدید لب و لہجے اور تازہ خیالی کو اپنانے والے رضی اختر شوق کی برسی ہے۔ وہ 22 جنوری 1999ء کو انتقال کرگئے تھے۔
اپنے ہم عصروں میں رضی اختر شوق کو ان کے سلیقۂ اظہارِ خیال ممتاز کرتا ہے۔ انھوں نے شاعری میں اپنے تخیل کو کچھ اس سلیقے سے برتا کہ ان کے متعدد اشعار زباں زدِ عام ہوگئے۔ ان کا کلام پسند کیا گیا اور شعری مجموعوں کو پذیرائی ملی۔
معروف شاعر رضی اختر شوقؔ کا اصل نام خواجہ رضیُ الحسن انصاری تھا۔ ان کا تعلق سہارن پور سے تھا۔ رضی اختر 1933ء میں پیدا ہوئے اور ابتدائی تعلیم حیدرآباد دکن میں مکمل کی۔ بعد میں وہ جامعہ عثمانیہ سے گریجویشن کی سند لے کر پاکستان چلے آئے۔ یہاں ان کی زندگی کراچی شہر میں بسر ہوئی اور وہ ادبی سرگرمیوں میں حصّہ لیتے رہے۔ مشاعرے، تنقیدی نشستیں اور دوسری ادبی تقاریب میں رضی اختر شوق کو ضرور مدعو کیا جاتا تھا۔ اسی زمانہ میں جامعہ کراچی سے ایم اے کی ڈگری حاصل کر کے ریڈیو پاکستان سے وابستہ ہو گئے۔ رضی اختر شاعر ہی نہیں ڈرامہ نویس بھی تھے۔ ریڈیو پاکستان کے لیے اسٹوڈیو نمبر نو کے نام سے ان کے تحریر کردہ ڈرامے اس مقبول تفریحی میڈیم کے طفیل سننے والوں کے لیے یادگار ثابت ہوئے۔
رضی اختر شوق کا شمار ان شعرا میں کیا جاتا ہے جن کا کلام خوب صورت جذبوں اور لطیف احساسات سے آراستہ ہے۔ سادہ اور پراثر شاعری ہمیں ان کے شعری مجموعوں ‘مرے موسم مرے خواب اور جست’ میں پڑھنے کو ملتی ہے۔
رضی اختر شوق کی ایک غزل دیکھیے۔
اے خدا صبر دے مجھ کو نہ شکیبائی دے
زخم وہ دے جو مری روح کو گہرائی دے
خلقتِ شہر یونہی خوش ہے تو پھر یوں ہی سہی
ان کو پتّھر دے، مجھے ظرفِ پذیرائی دے
جو نگاہوں میں ہے کچھ اس سے سوا بھی دیکھوں
یا اِن آنکھوں کو بجھا یا انہیں بینائی دے
تہمتِ عشق تو اس شہر میں کیا دے گا کوئی
کوئی اتنا بھی نہیں طعنہَ رسوائی دے
مجھ کو اس شہر کی درماندہ خرامی سے الگ
پھر مرے خواب دے اور پھر مری تنہائی دے
رضی اختر شوق کراچی میں عزیز آباد کے قبرستان میں آسودہ خاک ہیں۔
