سوشل میڈیا پر ویڈیو وائرل ہوئی ہے جس میں دولہا اپنی دلہن کو فلمی انداز میں موٹر سائیکل پر رخصت کرکے لے جا رہا ہے۔
نئے دور میں ہر چیز میں جدت کو پسند کیا جاتا ہے۔ بات شادی بیاہ کی تقریبات کی ہو تو ہر شخص اس میں کچھ نیا اور انوکھا کرنا چاہتا ہے۔ کچھ عرصے سے شادی میں دلہا اور دلہن کی انٹری مقبول ہوئی ہے جس میں دلہا دلہن منفرد انداز میں شادی ہال یا بینکوئٹ میں انٹری دیتے ہیں۔
آپ نے بھی ایسی کئی شادی کی تقریبات میں شرکت کی ہوگی جس میں دلہا اپنی دلہن کو ہال میں بگھی میں لے کر آتا ہے یا اسپورٹس کار، بائیک پر لاتا ہے لیکن ان دنوں سوشل میڈیا پر دلہن کی رخصتی کی ایک منفرد فلمی انداز کی ویڈیو وائرل ہو رہی ہے۔
شہر قائد کے مضافاتی علاقے سرجانی ٹاؤن میں بنائی گئی اس ویڈیو میں دولہا اپنی دلہن کو موٹر سائیکل پر رخصت کرکے لے جا رہا ہے۔ ٹوٹی پھوٹی سڑک پر ہچکولے کھاتی موٹر سائیکل پر دلہا اور دلہن انتہائی شاداں وفرحاں نظر آ رہے ہیں۔
ویڈیو کو دیکھ کر لگتا ہے کہ اس منفرد انداز کی فلمی رخصت دلہن کے من کو کچھ زیادہ ہی بھائی ہے جس کی خوشی اس کے چہرے اور انداز سے نمایاں ہے۔
اس انوکھی رخصتی کی ایک باراتی عقب میں رہتے ہوئے ویڈیو بناتا ہے جس کے بعد یہ ویڈیو سوشل میڈیا پر ’’سرجانی بوائز، ذرا ہٹ کے‘‘ کے ٹائٹل کے ساتھ وائرل ہوئی ہے۔
