پنجاب اور خیبر پختونخوا میں انتخابات کے لیے فنڈز کے اجرا کے حوالے سے الیکشن کمیشن نے پیشرفت رپورٹ سپریم کورٹ میں جمع کرا دی ہے۔
اے آر وائی نیوز کو الیکشن کمیشن کے ذرائع سے ملنے والی اطلاعات کے مطابق سپریم کورٹ میں جمع کرائی گئی رپورٹ میں عدالت عظمیٰ کو آگاہ کیا گیا ہے کہ پنجاب میں انتخابات کے لیے 21 ارب روپے کے درکار فنڈز تاحال الیکشن کمیشن کو نہیں ملے ہیں۔
سپریم کورٹ نے پنجاب میں 14 مئی کو صوبائی اسمبلی کے الیکشن کرانے کا حکم جاری کر رکھا ہے اس کے ساتھ ہی انتخابات کے لیے متعلقہ حکام کو 27 اپریل تک فنڈز الیکشن کمیشن کو فراہم کرنے کا حکم بھی دیا تھا۔
واضح رہے کہ سپریم کورٹ میں اسی سے متعلقہ ملک میں ایک ساتھ الیکشن کرانے کی درخواستیں بھی زیر سماعت ہیں۔
عدالت عظمیٰ نے گزشتہ روز سماعت میں چیف جسٹس عمر عطا بندیال نے رولنگ دیتے ہوئے کہا تھا کہ مذاکرات تو پہلے ہی ہو جانے چاہیے تھے۔ اس حوالے سے عدالتی فیصلے، آئین اور قانون موجود ہے۔ مذاکرات کرنے پر عدالت مجبور نہیں کر سکتی۔ عدالت تو صرف آئین پر عمل چاہتی ہے تا کہ تنازع کا حل نکلے۔ ہم نہ کوئی ہدایت کر رہے ہیں اور نہ ہی کوئی ٹائم لائن جاری کر رہے ہیں۔ اس کیس کا تحریری فیصلہ جاری کریں گے اور عدالت مناسب حکم نامہ جاری کرے گی۔
چیف جسٹس نے یہ بھی کہا تھا کہ سیاستدانوں کو خود سے مسائل کا حل نکالنا چاہیے۔ سازگار مذکرات کے ذریعے حل نہ نکلا تو آئین بھی موجود ہے اور ہمارا فیصلہ بھی جس کے بعد انہوں نے سماعت ملتوی کر دی تھی۔
