اسلام آباد: رواں برس نومبر 2021 کے دوران ترسیلات زر میں 0.6 فیصد اضافہ ہوا جبکہ مجموعی طور پر مالی سال 22-2021 کے پہلے 5 مہینوں میں ترسیلات زر بڑھ کر 12.9 ارب ڈالر ہوگئیں۔
تفصیلات کے مطابق نومبر 2021 کے دوران 2.4 ارب ڈالر کی رقوم آئیں، بیرون ملک مقیم کارکنوں کی ترسیلات زر جون 2020 سے لے کر اب تک 2 ارب ڈالر سے زائد رہی۔
گزشتہ سال کی نسبت رواں سال نومبر 2021 کے دوران ترسیلات زر میں 0.6 فیصد اضافہ ہوا جبکہ ان میں ماہانہ بنیاد پر ان میں 6.6 فیصد کمی ہوئی۔
مجموعی طور پر مالی سال 22-2021 کے پہلے 5 مہینوں میں ترسیلات زر بڑھ کر 12.9 ارب ڈالر ہوگئیں جبکہ یہ گزشتہ برس کی اسی مدت سے 9.7 فیصد زیادہ ہے۔
نومبر 2021 کے دوران ترسیلات زر زیادہ ترسعودی عرب سے 590 ملین ڈالر، متحدہ عرب امارات سے 452.5 ملین ڈالر، برطانیہ سے 305.8 ملین ڈالر اور امریکا سے 237.8 ملین ڈالر آئیں۔
حکومت اور اسٹیٹ بینک کی جانب سے باضابطہ چینلز کے استعمال کی ترغیب دینے کے لیے فعال پالیسی اقدامات اور وبا کے دوران فلاحی رقوم کی منتقلی سے پچھلے سال سے ترسیلات زر کی آمد میں مسلسل بہتری آئی ہے۔
