ایم کیو ایم پاکستان نے حیدرآباد ایئرپورٹ کی فوری بحالی کے لیے قومی اسمبلی میں آواز اٹھاتے ہوئے توجہ دلاؤ نوٹس جمع کرا دیا ہے۔
اے آر وائی نیوز کے مطابق ایم کیو ایم پاکستان کے اراکین قومی اسمبلی خواجہ اظہار الحسن، وسیم حسین اور عامر معین نے قومی اسمبلی میں توجہ دلاؤ نوٹس جمع کرایا ہے جس میں سندھ کے دوسرے بڑے شہر حیدرآباد میں ایئرپورٹ کی فوری بحالی کا مطالبہ کرتے ہوئے کہا گیا ہے کہ متعلقہ وزیر اس معاملے پر ایوان میں پالیسی وضع کریں۔
توجہ دلاؤ نوٹس میں کہا گیا ہے کہ حیدرآباد ایئرپورٹ کو 1998 میں تجارتی ٹریفک کے لیے بند کیا گیا تھا۔ جس کے بعد سندھ کے اس دوسرے بڑے شہر کے باسیون کو اندرون ملک سفر کے لیے بذریعہ روڈ دیگر شہروں کا سفر کرنا پڑتا ہے جس سے ان کے اخراجات میں اضافہ اور وقت کا ضیاع ہوتا ہے۔
ایم کیو ایم رہنماؤں کا کہنا ہے کہ ایئرپورٹ کی بندش سے حیدرآباد اور گرد ونواح کے لوگ شدید محرومی کا شکار ہیں کیونکہ بہترین سفری سہولتیں ان کا بھی حق ہیں۔ ہمارا مطالبہ ہے کہ حیدرآباد ایئرپورٹ کو دوبارہ بحال کر کے اندرون ملک فضائی سفر کی عوامی سہولت بحال کی جائے۔
حیدرآباد ایئرپورٹ تو فعال، مگر جہاز 10 سال سے نہیں اُڑ رہے
واضح رہے کہ چند روز قبل اے آر وائی نیوز نے حیدرآباد ایئرپورٹ کی بندش سے متعلق رپورٹ پیش کی تھی جس میں نشاندہی کی گئی تھی کہ ایئرپورٹ فعال تو ہے مگر پروازیں بند ہیں جس کی وجہ سے شہری بالخصوص تاجر برادری مشکلات کا شکار ہیں۔
