لکھنو: بھارتی ریاست اترپردیش میں انتہا پسندوں کے ہجوم نے بھارتی فوج سے ریٹائرڈ مسلمان کیپٹن کو بہیمانہ تشدد کرکے قتل کر دیا۔
تفصیلات کے مطابق مسلمان کیپٹن کے قتل کا واقعہ اترپردیش کے ضلع امیتی میں پیش آیا۔ ایس ایس پی دیارام نے بتایا کہ 64 سالہ کیپٹن (ر) امان اللہ اپنی اہلیہ کے ہمراہ گھر تھے جب انتہا پسندوں کے ایک ہجوم نے لاٹھیوں اور ڈنڈوں سے حملہ کردیا۔
ایس ایس پی کا کہنا تھا کہ امان اللہ کے سر پر گہری چوٹ لگنے سے وہ موقع پر ہی دم توڑ گئے۔
پولیس کے مطابق کیپٹن ریٹائرڈ امان اللہ کی لاش پوسٹ مارٹم کے لیے بھیج دی گئی ہے جبکہ تحقیقات جاری ہیں۔
بھارت میں انتہاپسندوں نے ایک اور مسلمان نوجوان کو قتل کردیا
اس سے قبل گزشتہ ماہ بھارتی ریاست جھاڑکھنڈ ضلع کھرسانواں میں ہندوانتہاپسندوں کے ہجوم نے مسلمان نوجوان شمس تبریز انصاری کو موٹر سائیکل چوری کا بہانہ بنا کربہیمانہ تشدد کا نشانہ بنایا تھا۔ تبریز کئی گھنٹے تک موت و زندگی کی کشمکش میں رہنے کے بعد زخموں کی تاب نہ لاتے ہوئے جان کی بازی ہار گیا تھا۔
بھارت: مسلمان رہنما اور سابق پولیس افسر شبیر حسین زیدی قتل
یاد رہے کہ رواں سال مارچ میں بھارت کی سیاسی جماعت کے مسلمان رہنما اور سابق پولیس افسر شبیر حسین زیدی کو نامعلوم افراد نے فائرنگ کر کے قتل کردیا گیا تھا۔
بھارتی میڈیا رپورٹس کے مطابق شبیر حسین زیدی کو غازی آباد کے علاقے اترآنچل میں اُس وقت نشانہ بنایا گیا جب وہ اپنی رہائش گاہ کے باہر چہل قدمی کررہے تھے۔
