کراچی: شہر قائد کے علاقے سولجر بازار، گل رانا کالونی میں ایک شخص جھلس کر جاں بحق ہو گیا ہے، جس کی شناخت ایک ریٹائرڈ پولیس اہلکار کے طور پر ہوئی ہے۔
تفصیلات کے مطابق سولجر بازار کے علاقے گل رانا کالونی میں ایک گھر سے ایک ریٹائرڈ پولیس اہلکار کی جھلسی ہوئی لاش برآمد ہوئی ہے، جس کی شناخت سلیم انصاری کے نام سے ہوئی ہے۔
اطلاع ملتے ہی پولیس اور کرائم سین یونٹ موقع پر پہنچ گیا اور تحقیقات شروع کر دی، ابتدائی طور پر پولیس نے ریٹائرڈ پولیس اہلکار کی جھلسنے سے موت مشکوک قرار دے دی ہے۔ پولیس کا کہنا ہے کہ گھر سے ملنے والے شواہد کے مطابق واقعہ مشکوک ہے۔
پولیس بیان کے مطابق متوفی گھر میں اکیلا رہتا تھا، 2 بیٹے ہیں جو الگ رہتے ہیں، جس گھر سے لاش برآمد ہوئی وہ اندر سے بند تھا، جاں بحق شخص کا ایک بیٹا بھی پولیس اہلکار ہے، ایک بیٹا اور بہو نیچے والے پورشن میں رہائش پذیر ہے۔
پولیس حکام کا کہنا ہے کہ کمرے میں شارٹ سرکٹ کے آثار نہیں ملے، صرف بستر جلا ہوا ہے، آگ لگنے پر کسی نے چیخ و پکار بھی نہیں سنی، حقائق سامنے لانے کے لیے لاش کا پوسٹ مارٹم کرایا جائے گا، پولیس نے یہ بھی کہا کہ متوفی کا بیٹا پوسٹ مارٹم سے انکار کر رہا ہے۔
