پاکستان کے وکٹ کیپر بلے باز محمد رضوان افغانستان کے خلاف ٹی ٹوئنٹی سیریز ہارنے والی نوجوان پاکستانی ٹیم کی حمایت میں آگئے۔
سیریز میں ناکامی کی وجہ سے شائقین نوجوان ٹیم سے ناراض دکھائی دے رہے ہیں اور افغانستان سے سیریز میں شکست کا ذمہ دار کپتانی کے ساتھ ساتھ بیٹنگ لائن کو بھی قرار دے رہے ہیں۔
اس پر محمد رضوان نے نوجوانوں پر اپنی بے پناہ حمایت کا اظہار کیا ہے۔
اپنے ٹوئٹر بیان میں رضوان نے لکھا کہ میں پاکستان کرکٹ کے ان نوجوان سپر اسٹارز پر پختہ یقین رکھتا ہوں، مضبوط رہو، ان نقصانات کو اپنے اندر کی آگ کو بھڑکانے دو، سخت محنت کرتے رہو اور یقین رکھو تم چیمپئن ہو، تم شاندار واپسی کرو گے۔
I strongly believe in these young superstars of Pakistan cricket. Stay strong. Let these losses fuel your inner fire. Keep working hard. Keep believing. You are champions. You will come back with a bang. #PakistanZindabad
— Muhammad Rizwan (@iMRizwanPak) March 27, 2023
شارجہ میں کھیلی جا رہی تین ٹی 20 میچوں پر مشتمل سیریز کے ابتدائی دو میچز جیت کر افغانستان سیریز میں نہ صرف فیصلہ کن برتری بلکہ پاکستان سے پہلی بار سیریز جیتنے کا تاریخی کارنامہ انجام دیا ہے۔ اس شکست کے بعد پاکستانی کپتان شاداب خان نے میڈیا سے گفتگو کرتے ہوئے قوم سے اپیل کی ہے کہ وہ نئے کھلاڑیوں کی حوصلہ افزائی کرے۔
شاداب خان نے افغانستان کے خلاف دوسرے میچ اور سیریز میں شکست کی وجہ ناکام بیٹنگ کو قرار دیتے ہوئے کہا کہ کم رنز اسکور کیے جو شکست کی وجہ بنے۔ پاور پلے میں اگر تین وکٹیں گر جائیں تو پھر میچ میں واپسی کرنا مشکل ہوجاتا ہے۔ افغانستان کی ٹیم ان کنڈیشنز میں مضبوط حریف ہے۔
سیریز کا تیسرا اور آخری میچ آج شارجہ میں کھیلا جائے گا۔
واضح رہے کہ مذکورہ سیریز کے لیے ریگولر قومی کپتان بابر اعظم، ان فارم محمد رضوان، لاہور قلندرز کو چیمپئن بنانے والے اسٹار فاسٹ بولر شاہین شاہ آفریدی اور جارح مزاج اوپنر فخر زمان کو آرام دیا گیا تھا اور ٹیم میں ان کی جگہ پی ایس ایل میں اچھی کارکردگی کا مظاہرہ کرنے والے چار نئے کھلاڑیوں صائم ایوب، احسان اللہ، زمان خان اور طیب طاہر کا ڈیبیو کرایا تھا۔ تاہم اب تک کھیلے گئے دو میچز میں سوائے احسان اللہ کے کوئی قابل ذکر کارکردگی کا مظاہرہ نہیں کرسکا۔
