پشاور: خیبر پختونخواہ کابینہ نے سیاحت کے فروغ کے لیے اہم اقدام کرتے ہوئے متعدد سڑکوں کی تعمیر و مرمت کی منظوری دے دی۔
تفصیلات کے مطابق خیبر پختونخواہ کابینہ نے سیاحت کے لیے اہمیت کی حامل اہم سڑکوں کی تعمیر کی منظوری دے دی، 127 کلو میٹر سڑکیں عالمی بینک کے تعاون سے تعمیر کی جائیں گی۔
منصوبے میں 24 کلو میٹر ٹھنڈیانی سڑک کی توسیع بھی شامل ہے۔ 35 کلو میٹر وادی سپات کوہستان کی تعمیر، 45 کلو میٹر شیشی کوہ تا مداکلاشٹ چترال روڈ اور 23 کلو میٹر مانکیال تا بڈہ سیرئے روڈ بھی منصوبے میں شامل ہے۔
وزیر اعلیٰ خیبر پختونخواہ محمود خان کا کہنا ہے کہ سڑکوں کی تعمیر سے سفری سہولیات میسر ہوں گی، سڑکوں کی تعمیر سے سیاحت کو فروغ ملے گا۔
انہوں نے کہا کہ صوبائی حکومت صوبے کے تمام علاقوں میں سیاحت کے فروغ کے لیے کوشاں ہے۔
خیال رہے کہ پختونخواہ کے 3 سیاحتی علاقوں کالام، کمراٹ اور کیلاش کے لیے الگ اتھارٹیز قائم کردی گئی ہیں جن کا مقصد یہاں کی سیاحت کو فروغ دینا ہے۔
اتھارٹیز کے قیام سے ان علاقوں کی سیاحت کو مزید تقویت ملے گی، اتھارٹیز علاقوں کا قدرتی حسن برقرار رکھنے کے لیے کردار ادا کریں گی۔
ذرائع کا کہنا ہے کہ اتھارٹیز کے قیام کے بعد تعمیرات یا عمارت کی خلاف ورزی پر 3 سال قید اور 10 لاکھ روپے جرمانہ ہوگا، بغیراجازت رہائشی اسکیموں سے متعلق 3 سال قید یا 50 لاکھ روپے جرمانہ ہوگا۔
