کراچی : ابوالحسن اصفحانی روڈ پر پیٹرول پمپ پر ڈکیتی کی بڑی واردات کے دوران ملزمان 80 لاکھ روپے چھین کر فرارہو گئے۔

تفصیلات کے مطابق کراچی کے علاقے ابوالحسن اصفحانی روڈ پیٹرول پمپ پر بڑی واردات ہوئی ، جہاں مسلح ملزمان کیشئر سے 80 لاکھ روپے لوٹ کر فرار ہوگئے۔

پولیس نے بتایا کہ بینک میں رقم جمع کرانے سے پہلے ہی 80 لاکھ روپے چھین لئے گئے۔

اے آروائی نیوز براہِ راست دیکھیں live.arynews.tv پر

حکام کا کہنا تھا کہ پیٹرول پمپ کا کیشئر ملازم کے ہمراہ موٹر سائیکل پر قریب واقع بینک پہنچا تھا کہ 2 موٹرسائیکل پر سوار 4 ملزمان کیشئر سے رقم چھین کر فرار ہوئے، ملزمان ہیلمٹ پہنے ہوئے تھے۔

ابوالحسن اصفہانی روڈ پر 80 لاکھ روپے ڈکیتی کی واردارت میں فرارمبینہ ملزمان کی سی سی ٹی وی فوٹیج بھی سامنے آگئی ہے۔

فوٹیج میں 2موٹر سائیکل پر 4 ملزمان کو جاتے دیکھا جا سکتا ہے ، مبینہ طور پر فوٹیج میں نظر آنیوالے ملزمان نے واردات کی۔

اس سے قبل کراچی پولیس نے چار مبینہ ڈاکوؤں کو گرفتار کیا تھا، جو لاہور کے سونے کے تاجر سے تین کروڑ روپے لوٹنے میں ملوث تھے۔

پولیس نے مبینہ ڈاکو کے قبضے سے 4.6 ملین روپے کی نقدی بھی برآمد کی تھی۔

ڈی آئی جی ساؤتھ شرجیل کھرل نے پریس کانفرنس کرتے ہوئے بتایا تھا کہ ڈاکو 2 فروری کو تاجر سے تین کروڑ روپے لوٹ کر فرار ہوگئے تھے۔