کراچی: شہر قائد میں ہونے والی ایک واردات میں نوجوان نے بہادری دکھاتے ہوئے ڈاکو سے پستول چھین لی تاہم گولی چلاتے وقت معلوم ہوا کہ ڈاکو بغیر میگزین والی پستول کے ساتھ واردات کر رہے تھے۔
تفصیلات کے مطابق کراچی کے علاقے گارڈن ویسٹ میں نوجوان نے ڈکیتی کرنے والے ڈاکو کی پستول چھین لی، نوجوان نے جب ملزم پر فائر کیا تو پتا چلا گن کا میگزین ہی نہیں تھا، ڈاکو موبائل فون لے کر بھاگ نکلے۔
واردات کی سی سی ٹی وی فوٹیج اے آر وائی نیوز نے حاصل کر لی، فوٹیج میں پہلے ایک ڈاکو کو، اور پھر دوسرے ڈاکو کو اندر آتے دیکھا جا سکتا ہے، ڈاکو کا ساتھی دکاندار کا فون اٹھا کر اندر چلا گیا، تاہم اس دوران کرسی پر کھانا کھاتا نوجوان اچانک اٹھا اور ڈاکو کی پستول چھینی لی، جس پر دونوں ڈاکو بدحواس ہو کر نوجوان کے پیچھے باہر بھاگے۔
نوجوان نے پولیس کو بیان دیا کہ وہ جم جانے کے لیے دوست کی دکان پر پہنچا، بھوک لگی تھی تو بریانی منگوا لی، 3 مرتبہ چکر لگانے کے بعد 2 افراد دکان کے اندر آئے اور لوڈ کا پوچھا، پھر دکاندار پر گن رکھ دی اور کہا چپ کر کے بیٹھے رہو۔
بیان میں نوجوان نے کہا کہ ڈاکو نے پہلے کاؤنٹر سے اس کے بعد میرا موبائل فون اٹھایا، میں نے دیکھا کہ ڈاکو کا دھیان اپنے پستول کی طرف ہے ہی نہیں، میں پستول لے کر دکان کے باہر بھاگا اور ڈاکو پر فائر کر دیا، لیکن پتا چلا کہ پستول کے اندر تو میگزین نہیں تھا۔
چلتے جھولے میں لاک کھول کر کھڑے ہونے کا بھیانک انجام، دل دہلا دینے والی ویڈیو
نوجوان نے بتایا کہ ان کی ڈاکو سے ہاتھا پائی بھی ہوئی، اور ڈاکو کو انھوں نے بٹ بھی مارے لیکن وہ موبائل فون لے کر بھاگنے میں کامیاب ہو گئے، اس دوران مارکیٹ میں کوئی مدد کو نہیں آیا، نوجوان نے کہا کہ فوٹیجز میں ملزمان کے چہرے واضح دیکھے جا سکتے ہیں۔
