ناخن ہمارے جسم کا نہایت اہم حصہ ہیں یہ نہ صرف ہاتھوں کی خوبصورتی میں اضافہ کرتے ہیں بلکہ اس کی ساخت اور رنگت ہمیں بیماریوں کا پتا دیتی ہے۔
جی ہاں !! ہماری انگلیوں کے ناخن صحت کے بارے میں ہمیں بہت کچھ بتاسکتے ہیں، اس بات پر یقین کرنا شاید مشکل ہو مگر ڈاکٹرز ناخنوں کو دیکھ کر آپ کی صحت کے بارے میں بہت کچھ بتاسکتے ہیں۔
اس حوالے سے اے آر وائی نیوز کے پروگرام باخبر سویرا میں ماہر امراض جلد بال و ناخن ڈاکٹر کاشف احمد نے ناخنوں کی نگہداشت اور صحت کو بہتر بنانے کیلئے مفید مشورے دیئے۔
ان کا کہنا تھا کہ جسم کا یہ حصہ جسے تکنیکی اصطلاح میں نیل پلیٹ بھی کہا جاتا ہے ہماری کی صحت کے مختلف مسائل کی نشاندہی کرسکتا ہے۔
انہوں نے بتایا کہ اپنے ناخنوں کے رنگ میں تبدیلی یا ان پر دھبوں کا ظاہر ہونا اور دیگر علامات پر توجہ دینا ضروری ہے جو بہت سی بیماریوں کے لیے انتباہ کا کام کرتے ہیں۔
ڈاکٹر کاشف کا کہنا تھا کہ ناخنوں پر لکیریں بھی پڑ جاتی ہیں جس کی کئی وجوہات ہوسکتی ہیں بیویس لائنز کے نام سے جانے جانی والی یہ لکیریں افقی لکیروں سے ملتی جلتی ہیں اور تیز بخار یا کیموتھراپی کے علاج کے بعد ناخنوں پر ظاہر ہوسکتی ہیں۔
جب ناخن کے اس حصے پر کوئی ضرب پہنچتی ہے تو اس جگہ پر لکیروں کا بننا معمول کی بات ہے، جس سے ناخن پر زیادہ جھریاں پڑجاتی ہے لیکن اگر یہ لکیریں زیادہ گہری ہوجائیں تو خطرے کی علامت ہے اس لیے فوری طور پر ڈاکٹر سے رجوع کریں۔
اس کے علاوہ اگر تو ناخن کا اوپری حصہ سفید ہوجائے تو یہ عام طور پر عمر بڑھنے کی علامت ہوتا ہے، تاہم آپ کسی اور مرض یا طبی مسئلے کا شکار ہیں تو ڈاکٹر سے ضرور رجوع کریں کیونکہ یہ سفید ناخن گردوں جگر یا امراض قلب کا اشارہ ہوسکتے ہیں۔
