شمالی افریقی ملک الجزائر میں 2 ہزار سال قدیم رومی حمام آج بھی فعال ہے اور مقامی و غیر ملکی افراد کی بڑی تعداد یہاں کا رخ کرتی ہے۔
قدیم ادوار میں گرم حمام کئی خطوں میں پائے جاتے تھے جو روزمرہ زندگی کا لازمی جزو ہوتے تھے۔ حمام ایک سماجی حیثیت رکھتے تھے جو لوگوں کی جسمانی صحت پر بھی مفید اثرات مرتب کرتے تھے۔
ایسا ہی ایک قدیم حمام الجزائر میں بھی موجود ہے جو آج بھی فعال ہے۔ ایک زمانے میں الجزائر میں رومی حکومت کیا کرتے تھے، یہ قدیم حمام اسی دور کی یاددگار ہے۔ اس حمام کو قومی ثقافتی ورثے میں شامل کیا جا چکا ہے۔
الجزائر کے شمالی حصے میں الہما نامی قصبے میں واقع یہ حمام سطح سمندر سے 4 ہزار 9 سو 21 فٹ بلند ہے۔ یہاں کا پانی نہایت صاف شفاف اور معدنیات سے بھرپور ہے۔
یہاں 70 سینٹی گریڈ تک گرم پانی گٹھیا، جلدی امراض اور سانس کے امراض میں افاقہ کرتا ہے جبکہ یہاں فزیو تھراپسٹ بھی موجود ہیں جو مساج اور ہائیڈرو تھراپی کی سہولت فراہم کرتے ہیں۔
حمام میں خواتین کے لیے بھی علیحدہ حصہ مخصوص ہے۔ ایک اندازے کے مطابق ہر سال 7 لاکھ کے قریب افراد یہاں کا رخ کرتے ہیں اور یہاں کی سہولیات سے لطف اندوز ہوتے ہیں۔
